Ka West Jaiñtia District Sports Association (WJDSA) Jowai ha kane ka sngi Saitjaiñ kala pynkut noh ïa ka jingïalehkai phianal jong ka ‘Open To All Badminton Tournament 2022’ & District Open Badminton Championship ha Kiang Nangbah Indoor Stadium Dongmihsngi Jowai, ïa kane ka lympung la wan ban pynhap pyrda da u ma M.A Challam (MCS) kum u kongsan.
Ha kane ka lympung ïalehkai Badminton la sdang ïa ka naduh ka 13 tarik mynta u bnai ban pynkut hynnin ka sngi 17 tarik ba la pynïakhun ha ki kyrdan bapher bapher (Boys & Girls). Ïa kane ka lympung la pynlong shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun phainal ha ka kyrdan Under-13 Boys (single) u Fadey R Kyndait ula pynliem da 21/14, 21/13 ïa u Nehemaia J J Tariang, ha ka Under-15 Boys (Single) u Lechan Suchiang ula jop da 21/15, 21/10 ïa u Salonbhami Suchiang, ha ka Under-19 Boys Single u Lemiwel Nelson Suchiang ula jop da 20/22, 21/16, 21/19 ïa u Banshanbor Lamare.
Ha ka Men Doubles u Mebankerlang Shullai & Gregoreo Passah kila jop da 21/19, 21/19 ïa u Buromlangki Lakiang & Deilangwa-oo Nongpluh, ha ka Men Singles u Mebankerlang Shullai ula pynliem da 21/14, 18/21, 21/12 ïa u Gregoreo Passah.
Katba ha ka liang ki kynthei Women Double ka Ribhalang Passah & ka Josefina Dala Passah kila jop da 21/18, 18/21, 21/17 ïa ka Emilanadaka Chyrmang & ka Balashembha Passah. Ha ka Mixed Doubles u Mebankerlang Shullai & ka Emilanadaka Chyrmang kila jop da 21/18,18/21,21/06 ïa ka Deilangwa-oo Nongpluh & ka Ribhalang Passah.
Ha ka 40+ Men’s Doubles u Damehi Kyndiah & u Marbiangki Bareh kila jop da 21/13, 21/17 ïa u Rimilan Passah & u Jlan Kupar Roy Rymbai, ha ka 40+ Men Singles u Marbiangki Bareh ula pynliem da 21/18, 22/20 ïa u Damehi Kyndiah, ha ka Women’s Singles ka Balashembha Passah kala jop da 21/15, 22/20 ïa ka Alvinia Kma, ha ka 55+ Men Singles u Lalnun Siama ïa u Ambrose N Gatphoh.
Ïa ki khunsnam sha ki nongjop la sam da u kongsan ha ryngkat ka jingdonlang u District Sports Officer ka WJDSA ma K. Passah bad ki nongïalam ba hakhmat jong ka West Jaiñtia District Sports Association.
