U myntri ka sorkar jylla uba dei peit ïa ka kam Sports bad ka rep ka riang u bah Banteidor Lyngdoh uba long ula wan ban pynhap pyrda ïa ka jingrakhe dap 25 snem ne ka ‘Silver Jubilee Celebration’ jong ka Lion Sports and Youth Affairs, Mission Compound Jowai ha ka jingïalang ba la pynlong ha Community Hall jong ka Lion Mission Compound Dorbar Chnong, Jowai, ha ka jingdonlang u symbud kongsan ba Phasmon Dkhar EM ka JHADC, u MDC ka thaiñ ma A.A. Shullai, ki nongïalam shnong bad kiwei de kiba la shah khot sngewbha.
U Myntri haba ai jingkren ula ai ka jingïaroh ïa ki nongpynïaid ka Lion Sports and Youth Affairs Mission Compound Jowai kaba la sdang ia ka jingiaid lynti naduh u snem 1996 haduh u 2021 kiba la aiti met bad mynsiem ban ai ka jingshakri kaba bha tam ïa ki khun samla jong ka shnong khamtam ha ka liang ka kam sport bad ki kam bhalang jong ka imlang ka sahlang.
U bah Banteidor u la ong ‘ba ki nong Jaiñtia ki dei ki briew kiba bat skhem ïala ka Dustur la jong haduh mynta ki sngi bad ka long kaba khamñiar bha ban shem ha kine ki sngi ba mynta’.
‘Ka jingbit jingbiang jong ka ri bad ka jaitbynriew ka shong eh ha ki khun samla na ka bynta ka lawei ba phyrnai, ym lah ban len ba ka jylla Meghalaya kumba long mynta katkum ka jinglum jingkheiñ (Statistic) kiba bun eh dei ki samla kiba don ha ka rta kaba 15-35 bad ka shong ha ka kti ki khun samla ban kyntiew ïa ka ri bad ka jaitbynriew’. Kumta ula kyntu ia baroh ki samla ban long kiba minot ha kino kino ki kam ba ki trei.
Ha kane ka sngi u myntri ula ai sngewbha da ka kor Computer sha ka Lion Sports and Youth Affairs khnang ba kan nanglang shuh shuh ban pynïaid shaphrang ïa ki kam ba bha jong ka.
Ka la don ka jingpyllait paidbah ïa ka Riti pynïaid kam (Constitution) bad ka Music Video da u Kongsan bad kumjuh ïa ka Souvenir da u MDC uba long u symbud kongsan, la don ruh ka jingsam khusam bad ki jingrwai bad shad tynrai ba la shim bynta da ki khun samla ka shnong.
Ïa ka jingialang la pynïaid da u Chairman ma Donkupar Syngkrem katba ïa ki kyntien ai khublei la ïoh na u ma Jemi R.L Laloo.
