Ka jingdon jong ka wei ka pla kaba la iehnoh ha ïew Polo kala pynher syrngiew ia ki paidbah ba bun ba lang. Ki paidbah kila suba bad mutdur ba ka lah ban dei ka pla kaba la thep lang bad u bomb ban ioh pynmynsaw ia ki riew paidbah.
Hadien ka jingwan poi jong ki Pulit ha ka por 2 baje janmiet kila shimti ia katei ka pla rong ïong ba la iehnoh ha īew Polo. Ha ka jingjurip ki Pulit la lap ba u trai jong katei ka pla u dei u ba la tip kyrteng kum u Nijimu Fithu, 24 snem ka rta, na Kenuozou Colony, Kohima Sadar, District, Nagaland u la kam trai ia katei ka pla rong ïong kaba la iehnoh ha ïew Polo.
Na ka liang ki Pulit kila pyntip sha ka kynhun bomb squad kaba la poi ha katei ka jaka bad pynlong ia ka jingjurib da ki tiar machine ban peit bniah ban weng ia kino kino ki jingma kiba don hatei ka pla rong ïong.
Ka kynhun ka la talasi bad la lap ba don 5 tylli ki jingsong kiba la tap bha da ki cargo tape bad 2 song pat kiba la tap da ka poster. Hadien ba la dep ban test la lap ba ki dei ki jingdih pynbuaid (Ganja) bad ki don ia ka jingkhia kaba 5kg 629grams.
Mar mar ki Pulit ki la pyntip sha ka kynhun Anti Narcotic Task Force (ANTF) ban leh ia kaba donkam bad ki la kem noh ia utei u briew uba la kam trai ia katei ka pla.
