Ha Khliehriat kaba dei ka nongbah jong ka East Jaintia Hills District la rakhe ïa ka sngi laitluid kaba 79 jong ka Ri India ha ryngkat ki prokram ba itynnad ba la pynlong da ki bor pynïaid District, East Jaiñtia Hills District ha madan ïalehkai jong ka Holy Family Parish, Khliehriat kaba la sakhi ïa ka jingïashim bynta shitrhem jong ki heh sorkar, ki samla pule bad ki nongshong shnong.
Ha kane ka jingrakhe, u Myntri sorkar u bah Shakliar Warjri ula wan ban pynher ia ka lama ka ri bad shim ruh ia ka Rashtriya Salute jong ki 31 tylli ki kynhun ba ia ki pulit ka Meghalaya, ki NCC Cadet, ki Scouts & Guides bad ki samla pule.
Ha kane ka sngi la sam khusnam sha ki Pulit kum ka jingithuh ia ka jingshakri jong ki. Ki Pulit kiba la ioh khusnam ki kynthup ia u Inspector Mathius Sangma, u Inspector Evantinus Pohchen, u SI Rajesh Das, u SI James Dkhar, u SI Returnback Swer bad u SI Sherkhan Buam.
La sam ruh ïa ki khusnam Best Supporting Teachers sha ka Kong Leela Rai, ka Kong Prerna Pradhan bad ka Kong Evelyn Jyrwa jong ka Oxford Secondary School, Lad Rymbai kum ka jingïaroh ïa ka jingaiti lut bad ka jingtbit jong ki ha ka kam ai jinghikai.
Ka Sutnga CHC and Pamra Paithlu PHC ki la shah pynkup burom kum ki ‘Best Performing health care Institutions’ ha ka jingpyntrei ia ka MHIS & Ayushman Bharat-Pradhan Mantri Jan Arogya Yojana (AB-PMJAY). Ka Pamra Paithlu PHC ka la ioh ruh ia ka khusnam ‘Best Performing PHC in East Jaintia Hills District’ ha ka jingai jingshakri ia ki paidbah ka thaiñ.
Ka Ms. Rupsi Sutnga jong ka Mookympad B Centre kaba don hapoh ka Khliehriat ICDS Project ka la ioh ia ka khusnam ‘Best Performing Anganwadi Worker’ jong ka District.
La sam ruh ïa ki khusnam sha ki nongjop ha ka jingïakob March Past bad Cultural items ha kaba ka skul Sohkymphor Secondary School, Sohkymphor bad ka Holy Family English School, Khliehriat ki la jop ïa ka kyrdan ba 1 bad ba 2 ha ka jingïakob March Past, katba ka Sacred Heart Secondary School, Byndihati, ka Little Star Secondary School, ka Lad Rymbai bad ka Khliehriat HSS, ki la ïoh ban khur ïa ka kyrdan ba 1 bad 2 bad ba 3 ha ka jingiakop Cultural prokram.
Ha kane ka sngi la leit ban sam ruh ïa ki jingai sngewbha da ki heh sorkar sha ki sah ha Shelter Home Boys, Khliehriat, Shelter Home Girls, Khliehriat, sha ka 7Tyndai Child Care Counselling Centre, Tuber Kmaishnong bad ha Civil Hospital, Khliehriat.
