U Lat ka jylla Meghalaya, u Phagu Chauhan ha ka 17 tarik mynta u bnai, u la pyniaid ia ka jingialang jong ka Annual Meeting ba 31 jong ka State Managing Committee of Special Fund for Reconstruction and Rehabilitation of Ex-servicemen ha Raj Bhavan, Shillong.
Ka jingthmu jong kane ka meeting ka long ban ia pyrkhat ia ki kam kiba iadei bad ka jingkoit jingkhiah ka suk ka miat jong ki shipai kiba la shongthait kiba trei ha ki kyrdan bapher bapher (kiba na ki tnad Army, Navy, Air Force), ka jingsiew ia ka tulop shongthait bad kiwei kiwei kiba ki dei ban ioh (Pensionary Benefits), ka Medical Allowances bad kiwei kiwei ki jingiarap kiba na ka sorkar pdeng bad ka sorkar jylla, bad kumjuh na ka bynta ka jingkoit jingkhiah bad ka jingbha jingmiat jong kito ki longkmie kiba la duh noh ia la u lok bad ki khun ki kti kiba dang shaniah ha ki.
Ha kane ka meeting, la ia kren ruh shapang kumno ban pynkiew ia ka pisa ba la thep da kine ki shipai ba la shongthait ha ka Sainik Welfare Board, ban kham pynbha ia ka jingshimbynta jong ki kynhun ba iasnoh lang kum kawei ban jingiatrei lang na ka bynta ka jingbha jingmiat, ban iarap ban pynrung kam biang ia ki shipai ba la shongthai ha kino kino ki jaka bad ban kyntiew ia ki grant sha ki Seng bad kynhun jong ki shipai ba la shongthait.
U Lat u la kren skhem sha ki dkhot ia ki jingkyrshan lang jong u ha kino kino ki jingpyrshang ia ki jingthmu ban pynbha ia ka jingkoit jingkhiat, jingbha jingmiat jong ki shipai ba la shongthait kumjuh ia ki longkmie kiba la duh noh ia la u lok bad bad ia ki khun ki kti kiba dang shaniah ha ki kiba shong ba sah ha ka jylla.
