Ka Hynñiewtrep Integrated Teritorial Organisation (HITO), Jaintia Hills mynta ka sngi kum ka dak ka jingpyrshah halor ka jingbymlah jong ka sorkar lyngba Jowai Municipal ban pynkhuid ia ki ñiut ki jakhliah ha ki bynta jong ka Iawmusiang bad Iawthymme ka la leit sieh syndon da ki banner ha ki jaka kiba dang sah kitei ki ñiut.
Ki nongialam jong ka HITO kila pynrem ia ka sorkar MDA namar ka jingkren jong ka bad ki kam kim iadei satia. Ka seng kala buh ia ki jingthoh kiba don ki dur jong u Chief Minister Congrad Sangma, u Deputy CM bah Preston Tynsong bad kiwei de ki Myntri sorkar bad ki Nongmihkhmat na rilum Jaintia kiba kynthup ia u ma Lahkmen Rymbui, ma Sniawbhalang Dhar, ma Kyrmen Shylla, ma Wailadmiki Shylla, ma Nujorki Sungoh, ma Commingone Ymbon bad u ma Shitlang Pale. Ha kine ki banner la buh ruh ia ki jingthoh ba ong “The New Meghalaya kawa jakhlia kawa da kular da u Conrad Sangma hei tung hei sma haduh wa tyrha I mynsiem rupa”, ia kine ki jingthoh la leit ban pynieng ha kylleng ki bynta jong ka Iawmusiang bad ruh ha Iawthymme ha ki jaka ba la pynlang ia ki ñiut.
Ka seng HITO lyngba u ma Lawyer Son War, President incharge WJH, ula dawa na ka sorkar ba dei ban pynduh pyndam noh shisyndon ia ka Municipal na kane ka District namar ba kam iahap ban don hapoh kine ki ri lum. Ula ong ruh ba dei ban aiti beit ia ki kam pynkhuid pynjngiar ha ka District Council kaba la ju peit ia kane ka kam ha ki por kiba mynshwa.
