Ka Dorbar Shnong Lapangap kala pynbna paidbah bala khang pyrshah ban pynïap pathar ïa ki dohum dohwah ha kylleng ki wah kiba dang hap hapoh u pud u sam jong ka Dorbar Shnong Lapangap.
Naka liang ka Dorbar Shnong Lapangap shi bynta ban khanglad ïa ka jingpyniap pathar ïa ki dohum dohwah, mynta ka sngi kala leit ban pynieng syndon da ki signboard jingmana, ha kiba bun ki bynta jong ki wah kiba don harud jong ka shnong Lapangap kata naduh ka wah Pynthor, wah Mynski, wah Mynriang bad ter ter.
Ha ka juh ka por ka Dorbar Shnong kala pyntip nangne shakhmat kam shah shuh ïa ki paidbah ban pyndonkam ïa ka rukom ber bih, pynbthei bom, bret jar lait noh tang da kaba khwai.
Halor kane ka jingmana lada lap ïa kino kino kiba leh pyrshah la ki dei ki trai shnong ne kiba nabar, ki lah ban shah pynshitom katkum ki kyndon aiñ jong ka Dorbar Shnong ha ryngkat ka kuna kaba heh.
