U Deputy Commissioner, ka West Jaiñtia Hills District u bah B.S. Sohliya, IAS, ula bthah mardor ia u Block Development Officer ka Thadlaskeiñ C&RD Block Development ban leit ati noh ia ka song jingiarap sha ki longïing kiba don jingiadei bad ki 4 ngut ki mynsiem kiba la khlad noh na ka daw jong ka jingshahban ha ka khyndew kaba la twa bad lynshop ia ka kamra thiah jong ki kaba la jia ha ka shnong Pynthor Langteiñ, kaba hap hapoh ka Thadlaskeiñ Block, West Jaiñtia Hills District.
Ha kaba iadei bad kane ka jingjia ka ophis jong u Deputy Commissioner kala mang mar 4 lak tyngka ia kawei kawei ka mynsiem bad baroh ka la kot sha 16 lak tyngka.
Ha kane ka jingjia u kpa jong ka ïing, ka kmie bad ar ngut ki khun kila khlad noh. Ia ka met jong kitei ki dkhot la dep ban khlong bad la pyndep ia ki kyndon jong ka aiñ la iathuh ka khubor bala phah na ophis treikam jong u DC, West Jaiñtia Hills District.