Ka Reserve Bank of India (RBI), Shillong lyngba ka prokram Field Level Financial Literacy Event (FLFLE), kaba la pynlong ha nongbah Nongstoiñ hynnin ka sngi (26/7/23) kala ioh ban pynioh ram sha ki nongrep, ki SHGs bad ruh sha ki nongsengkam la jong kiba hap hapoh ka District West Khasi Hills District kaba la kot shaduh ka T.1.08 klur tyngka.
Ia kane ka FLFLE la pynlong ha shnong Mawkawah kaba hap hapoh ka nongbah Nongstoiñ. Ia kane ka prokram la wan ban plie da u bah Olden Nongpluh, General Manager and Officer-in-Charge jong ka RBI, Shillong, ha ka jingiadon lang u GM (O-i-C) jong ka NABARD, ki nongtrei jong ka ophis BDO, Nongstoiñ kumjuh ki nongtrei na ki Bank ba don hapoh kane ka thaiñ.
Na ka liang jong ki nongkren kila ai ka jingbatai kaba bniah ia ki 160 ngut ki paidbah kiba la wan ban sngap ia kane ka prokram halor ki jingmyntoi kiba bun kiba lah ban ioh na ki Bank ne kino kino ki jaka bei pisa. Ki nongtrei jong ka RBI kila pynsngewthuh ruh sha ki paidbah halor ka jingdonkam ban tip kumno ban iada ne lait na ka jingshah thok ne shukor ha ki riew sniew kiba treikam lyngba ki Digital ne ki kot Internet.
Ki bor pyniaid shnong jong ka Mawkawah kynthup ia u Rangbah Shnong kila pynpaw ka jingiaroh ia ka RBI kaba la pynlong kum kine ki prokram kiba ai ka jingmyntoi ia ki paidbah khamtam sha ki thaiñ nongkyndong.
