Ha ka 19-12-2022 ka Northeast Institute of Professional Studies, East Khasi Hills District, Shillong ka la sam ia ki tiar shna mobile sha ki 100 ngut ki samla kiba la pyndep ia ki jinghikai pyntbit shna mobile phone kum shi bynta ban pynshlur ia ki ban sengkam lajong.
Ha kane ka sngi ka kong Masarsuk Tariang, Administrative Officer, MSSDS ka la long kum ka kongsan bad bad ka Audrey M Khonglam, SDO, MSSDS kum ka ka symbud kongsan ha ka jingiadon ryngkat u Michael Thongni uba dei u khliehduh bad trai ka NeIPS kaba dei kawei na ki shlem ai jinghikai ban sengkam lajong ia ki samla ka thaiñ.
Ka kong Masarsuk Tariang kum ka kongsan haba ai jingkren ka la iaroh ia ka jingtrei shitom u Michael Thongni uba len lade ban kyntiew ia ki lad kamai jong ki khun samla ka thaiñ lyngba kane ka shlem ai jinghikai NeIPS bad la pynsngew ruh ba u long u samla u ba iohi jngai na bynta ban kyntiew ia ka jylla ha bun ki liang, u la wan man ka por sha ka office ka jong ka ban pynsngew ba ki khun samla kin ioh ia ka jingkyrshan na ka sorkar.
Ha u bnai April, 2022 ka la ong ba ka Sorkar lyngba ka MSSDS ka la pynmih ia ka project SKILLS MEGHALAYA ban iarap kyrpang ia ki khun samla ban ai jinghikai pyntbit ha ki laiñ bapher bapher lyngba ka Institution kum ka NeIPS. Ka la kyntu ruh ia ki samla kiba la shim ia ka training ki dei ban pyndonkam hok ia ka sap kaba ki la dep shah pyntbit namar kan long ka jingkyrkhu ia ka lawei jong ki bad ka la ong ruh ba ka jingiaishah kadei kawei na ki lynti ban ai jingjop ban poi sha kliar jong ka thong, namar haba ki ioh iaki tiar ki lah ban sdang kam da kaba shong ha ïing bad pynkhlaiñ ia ka jingpyntip ban treikam lyngba ki kor internet ka juk mynta.
U Michael Thongni ha ka jingkren u la ong ba u dei uwei na ki nonghikai ha kawei na ki skul bah ha ka jylla Kerela bad u la iehnoh ia ka kam namar u angnud ban don ha jylla la jong ban leh eiei na ka bynta ki khun samla halor ka jingkyrduh kam, kumta u la shim ia ka sienjam bad thong ka long ban leh ei ei na bynta ban iakhun pyrshah ia ka jingkyrduh kam hapdeng ki khun samla bad dei ha ka snem 2014 da i bor barit u la sdang shakri na Nongstoin bad mynta u la don ha kylleng ki district ka jylla Meghalaya lyngba kane ka shlem ka kylla long ka jingkyrmen ia shibun ki khun samla.
U la ong haba u iaid ia kane ka kam treimon sngewbha kamdei kaba suk wat la ki jingeh bad ki shiah ba thar kimdei ban pynduh mynsiem hynrei ki long pynban ki maw jingkieng ba lah ban kyntiew na bynta ka jingbha ha ka imlang sahlang. U la ong ba ki samla ki long kum ki symbai namar ka imlang sahlang ka kyrmen bad shaniah ha ki ia ka lashai, kumta to jied ia ka nam babha ban long nuksa ia kiwei ki para samla bad u la kyntu ia ki samla bakim dei ban ap khmih lynti tang ia ki kam sorkar hynrei ngi dei ban long ki samla kiba lah ban thaw kam ruh na lade lyngba ki sap ba la dep hikai khnang ba kan long ka jingkyrkhu ia kiwei pat bad u la pynkut da kaba ong, haba skhem ki samla skhem ka lawei ka jylla.
