29 lak tyngka ka ram na ki bank kaba klem sut la sam sha ki nongrep
Kum ka jingbteng jong ka sorkar ban kynjoh shabaroh ki nongrep hapoh ka Jylla Meghalaya u Myntri Rangbah ka Jylla u Conrad K Sangma mynta ka sngi Saitjan ula leit jngoh ia ki nongrep kiba don ha Tikrikilla jong ka West Garo Hills ha kaba ula ioh ban sam ia ki Cheques sha ki 288 tylli ki kynhun nongrep (Producer Group) kaba la kot T.1.86 klur tyngka.
Mynta ka sngi ki nongrep na kylleng kiba don ha la ki jong ki jong ki kynhun kum ki Producers Group, ki Self Help Group bad ki Cooperative Society kila poi sha ka jingialang paidbah ha kaba u Myntri Rangbah ula iohlad ban pynshai ia ka jingtreikam jong ka sorkar lyngba ka FOCUS kaba dei ka prokram kaba kyntiew ia ka kam rep kam riang hapoh ka jylla, ha kaba ula ioh ruh ban sam ia katei ka song jingiarap sha kine ki kynhun nongrep.
Haba kren ha ka jingialang paidbah u Conrad ula iathuh ba ka sorkar ka don ka thong ba hapoh u bnai Lber mynta ka snem ka sorkar kan siew haduh T.17.28 klur tyngka sha ki 1650 tylli ki kynhun nongrep bad kat haduh ba kut ka snem mang tyngka jong ka 2022-23 sa kumba Rs.130 klur tynka yn sam ia kane ka jingiarap sha ki 16,800 tylli ki kynhun nongrep.
U Myntri Rangbah u la pynkynmaw ruh ba ka sorkar jylla kala jied ia ka 1 tarik u Nohprah (December) kum ka “Sngi ki Nongrep” bad kumta ka sorkar ka don jingkyrmen ba kumba 4.5 lak ngut ki nongrep hapoh ka jylla kin ioh ia ki lad jingiarap lyngba ki skhim bapher bapher.
U Conrad ula iathuh ruh ba hapoh kane ka prokram ka sorkar kala dep ban mang pisa haduh Rs.200 klur tyngka na ka bynta ban sam sha ki nongrep ha kylleng ki bynta jong ka jylla. Kane ka prokram kan kynthup ruh ia ki nongpynmih dud bad ki nongri sniang nalor kiwei de.
Ha kane ka juh ka sngi u Myntri Rangbah ula sam ruh ia ka ram lyngba ki bank kaba khlem hap ban siew sut kaba kot haduh T.29 lak tyngka bad ka Community Investment Funds kaba T.21 lak tyngka sha ki kynhun SHG bala pyniaid da ki longkmie.
Mynta ka sngi u Conrad Sangma u la iohlad ban ia phylliew jingmut bad ki nongioh bynta jong ka PMAYGm MGNREGS,NSAP, ki nongrep bad ki kynhun SHG, ha kaba ula pynpaw ba kane ka sorkar MDA ka don ia ka jingangnud ban tip ia ka jingeh kaba naduh trai jong ki nongrep khnang ba ka sorkar kan lah ban thaw ki lad ban wanrah ka jingmyntoi ia ki.