Pynithuh ka VPP ïa baroh 29 ngut ki kyrtong MDC sha ka JHADC, kyrmen ban khur 70%

Ka Voice of the People Party (VPP) mynta ka sngi 18 tarik u Nohprah, 2024 kala pynlong ïa ka jingïalang paidbah ban pynithuh ïa ki 29 ngut ki kyrtong ki ban ïakhun ïaka Election MDC sha ka Jaiñtia Hills Autonomous District Council (JHADC) ka ban sa long ha u bnai Rymphang jong u snem 2025.
Ïa kane ka jingïalang pynithuh la pynlong ha Iawmusiang ha stand Ummulong naduh ka por 11: 30 mynstep bala pynïaid da u Rijied Lamin. Ha kane ka sngi ki nongïalam ba hakhmat jong ka party kynthup ïa u President Rangbah ka seng u bah Ardent Miller Basaiawmoit (MLA), u bah Brightstarwell Marbaniang (MLA), Secretary State Election Committee Dr. Londoner Sohtun (SEC), u Chairman State Election Committee & Vice President VPP- Dr. Kara Chen, ki nongkitkam ka party nalor kiwei de.

Na ka liang ki nongkren ha kane ka sngi kila pynsngew ïa ki nongrim treikam ka seng VPP, kata ban sam hok ïa ka skim sha u paidbah uba dei hok ban ïoh bad ka Party ka ïeng haka nongrim ban ïada ïa ka jinglong hok ki trai ri trai muluk bad ban ai ka ‘jingsynshar hok bad ka bishar hok’.

Naka liang u President Rangbah ka VPP bah Ardent Miller Basaiawmoit ula pynsngew shibun ki nongrim jong ka seng VPP bad ki rukom treikam kiba long katkum ki kyndon riti treikam (Constitution), ula ong ha ka seng VPP ym don uno uno uba ha khlieh, lait na ka ‘Executive Committee’ kaba long ka bor ba hakhlieh duh.

Shuh shuh ula kynthoh jur halor ka rukom treikam jong kane ka sorkar ba mynta hapoh ka jingïalam ka MDA-2.0 kaba la pynduh jingkyrmen ïa kiba bun ba lang naduh ka rukom thung kam thung jam, ka jingsynshar donbor kaba ktah ïa u paidbah ba duk ba kyrduh, ka jingduh tulop ki nongtrei sorkar bapher bapher, nalor ka jinghiar arsut jong ka jylla ha baroh ki liang bad ka jingdap ram.

Ula kynthoh ruh halor ka jingkynrei ki kam sniew ba bun jait kiba kane ka sorkar mynta kam lah shuh ban tehlakam bad kine ki jingsniew kila pynngop ïa ki khun samla shynrang bad kynthei ha ki jingdih pynbuaid kum ka Kyiad, u Drug, ki kam awria, ki jinglehkmen ba sniew bad kiwei de.

Ula pynrem ruh halor ka jingdkoh treikam jong ka sorkar kaba peit tang ïa ka jingmyntoi jong ki katto katne ngut, “wat ïaka jingriewspah jong ka mariang ha ki thaiñ East Jaiñtia la pynjot pynpra bad die sha ki bar jylla ïa ka kyndew ka shyiap bad la ailad ruh ban pynïaid ïa ka khaïi ka pateng sha ki nongwei.

Ha ka juh ka por ula ong hashwa ba kine ki 29 ngut ki kyrtong ka VPP kin leit sha ki paidbah ki da hap ban rah lang ïa ki mat bad ki hukum jong ka seng, ula buh ruh ka jingkyntu ïa kitei ki 29 ngut ki kyrtong kiba ka seng kala don jingkyrmen ba kin jop. Ka VPP ka don ka thong ban jop 70 na ka 100 (70%) ha kane ka Election MDC ha KHADC bad JHADC la ong u bah Ardent.

Kum u President ba Rangbah u kyntu da ka mon sngewbha ïa ki paidbah nongshong shnong ka jylla ba kin pynjop don burom ïa ka seng VPP ha kane ka Election MDC kaba dei ka jingïakhun Semi Final hadien ba ka seng kala jop ïaka jingïakhun Quarter Final haka MP Election bad kaba sah haka ‘Final’ ka ban long ha u snem 2028 kaba dei ka Election MLA.

Hadien kane ka jingïalang ki paidbah kila leit ban ai khublei markhmat ïa u President Rangbah ka VPP, ïaki nongïalam ka seng bad kynjuh ïa kitei ki 29 ngut ki kyrtong MDC sha JHADC.

Kine ki 29 ngut ki kyrtong MDC sha ka JHADC ïa kiba ka Party kala dep ban jied sani bha da ka State Election Committee ki kynthup:-

1. War-East ïa u Isaak Shylla,
2. War-Central ïa u Jamshaphrang Pohtam,
3. War-West ïa u Batskhem Hayong,
4. Amwi-Khliehtyrshi: ïa u Dr. Samely Shylla,
5. Mukhla-Ummulong: ïa u Nehemaiah Lamare,
6. Moodymmai-Nongkhroh: ïa u Closroy Laloo,
7. Nartiang-Wahlajer: ïa u Yoowanmi Myrïa,
8. Moodop-Umladang: ïa u Chanbor Rymbai,
9. Mynso-Nongjngi: ïa ka Laiawanlam Jinghun Khyriem,
10. Mynsngat-Khanduli: ïa ka Darapbiang Mulieh,
11. Shilliang Myntang: ïa u Darimi Liam,
12. Barato-Mukroh: ïa u Sarlangki Dkhar,
13. Saphai-Sahsniang: ïa u Thiyo Lapasam,
14. Mowkaiaw: ïa u Rimiki Niang,
15. Raliang: ïa u T.Z. Dkhar,
16. Shangpung: ïa u Hameshaniah Suiam,
17. Nangbah – Mihmyntdu: ïa u Gresentus Susngi,
18. Jowai-North: ïa u Andrew A. Shullai,
19. Jowai-South: ïa u Iaibatlang Talang,
20. Muthlong: ïa u Soki Lapasam,
21. Tuber-Wapungshnong: ïa u Delmon Phawa,
22. Musniang- Rangad: ïa u Damewanhi Rymbai,
23. Rymbai-Khliehriat: ïa u Tyngshain Phawa,
24. Sutnga-Narwan: ïa ka Lamsuk Langstang,
25. Sutnga-Nongkhlieh: ïa ka Lastborn Sympli,
26. Sumer: ïa u Dakeinkor Tangliang,
27. Saipung-Nongkhlieh: ïa u Prince Sukhlaiñ,
28. Narpuh: ïa ka Deiwi Tongper,
29. Bataw-Lakadong ïa u Levenson Suchiang.