Ka Meghalaya Pradesh Congress Committee (MPCC) mynta ka sngi 14 tarik u Kyllalyngkot 2025 kala lum ïaka jingïalang ha CTC Orchid Thadlaskeiñ, West Jaiñtia Hills District ban pynithuh ïaki 18 ngut ki kyrtong ki ban ïakhun ïa ka Election MDC sha ka Jaiñtia Hills Autonomous District Council (JHADC).
Ïa kitei ki kyrtong la pynithuh da u MP barim uba dei ruh u President ka MPCC ma Vincent H. Pala, kine ki 18 ngut ki kynthup ïa u Romeo Lyngdoh na War Central, u ma Madonbai Rymbai na Awwi Khliehtyrshi, ma Bitos Sari na Mukhla-Ummulong, ma Jona Rynjah na Moodymmai Nongkhroh, ma Katbanbiang Lamare na Nartiang Wahiajer, ma Richard Sing Lamare na Mynso Nongjngi, ka Banikas Laban na Barato-Mukroh, ma Rikut Parien na Saphai Sahsniang, ma Welpard Suchiang na Raliang, ma J. Treilang Suchiang na Shangpung, ma Saron Paswet na Jowai South, ma Yookini Phawa na Muthlong-Sohkymphor, ma Siril Suja na Sutnga Nongkhlieh, ma Lalwilliama Thiaite na Saipung Nongkhlieh, ma Grimlang Dkhar na Narpuh, ma Bashan Tangliang na Sumer, ma Brosent Siangshai na Musniang Ryngad bad u ma Pynbiangmi Laloo na Mowkaiaw.
Na ka liang u President ka MPCC ma Vincent H. Pala haba ai jingkren ula kyntu ïa kitei kyrtong ba kin long kiba stad namar ka riti ka dustur ka don haka bor jong ka District Council ban pynïoh myntoi ïa ki nongshong shnong.
Shuh shuh ula khot lang ïa baroh ki nongkyrshan jong ka Party Congress ba kin trei shitom met bad mynsiem ban pynjop donburom biang ïaka Party Congress. Ha ka juh ka por u kyntu ïa ki kyrtong MDC jong ka seng ba kin long kiba sngewrit bad kiba aiti naka bynta ki nongshong shnong.
Ula kyntu jur da kaba ong “ha ka por kanbas Election, ym donkam ban ïa kynnoh iwei ïa iwei ne maham ïano ïano, namar ki paidbah ha kane ka juk ba mynta kila tip lut ïa ka nongrim jong ka Party bad kila long ruh ki nongshnong shnong kiba stad ban jied haka nongrim”.
Kum ka National Party haka rukom synshar ka don ïa ka juh ka sur bad ka jingkwah jong ka Party ka long ban synshar bha, ban pynbha, ban ïatrei ryngkat ki nongshnong shnong bad ban ïada ïaka jaitbynriew, la ong u ma Pala.
Ha kaba ïadei bad ki kyrtong MDC u ma Pala ula pyntip ba ka Party kala dep ban ai Training ïa baroh ki kyrtong ki ban ïakhun Election, khnang ba kin tip kumno ban ïaid haka lynti kaba dei ban ai ka jingshakri hok ïa u Paidbah ka Ri. Ula pyntip ruh kaba donkam bha mynta ka long ban pynkup bor ïa ki kynthei khnang ba kin lah ban teh lakam ïa ki kam sniew kiba ha rukom.
Katba u ma Rikut Parien ula ong ‘ka hok jong ki nongshnong shnong ka dei ka hok jong ka kyndew ka shyiap bad ka hok ban pynkhlaiñ ïaka Riti ka Dustur ha ka jinglong kyrtpang jong ka”.
Kum u kyrtong ula ong dei tang ka Party Congress kaba ïeng ha nongrim kaba khlem kylla jutang haduh mynta, haka Party Congress kam don jingsngewpher la haka rukom ngeit ñiam, ka jingsngewpher hapdeng u nongkyndong bad nongsor kumjuh hapdeng uba ïoh ba duk, namar ka Party ka ïeng ban synshar laidluid da u paidbah, ïa u paidbah bad na ka bynta u paidbah.
Katba ïa ki kyntien ai khublei ha kane ka sngi la ïoh na u ma E.G. War, General Secretary ka West Jaiñtia Hills District Congress Committee, Na ka liang ka Party kaba pyntip baka lah ban ai tiket sa ïa kiwei de ki Constituency kiba dang sah hadien bala dep ban jurip bniah ïa ki kyrtong.
