Ka Sub-Divisional Officer jong ka Sohra Civil Sub-Division ka Miss. Saloni Verma, IAS kala pynjari da ka kyndon 144 CrPC ban iada na ka jingpluh ding ha kylleng ki bynta jong ka Sohra Civil Sub-Division.
Dangshen ka SDO (Civil) kala ioh ka jingujor ba ka la don shibun ki jingjia pluh ding ha ki bynta ba pher ba pher jong ka Sub-Division na ka daw jong ka jingthang ding pathar ha ki jaka ba pher ba pher. Kane ka jingpluh ding kala wan rah ka jingduhnong ym tang ia ki ophis sorkar hynrei wat ia ki riew shimet ruh.
Ka khubor sorkar ka iathuh ba kum kine ki jingjia pluh ding ki shait jia bha ha ki bnai November haduh u April kumba ju long ha ki snem kiba la dep bad kane kala ktah shibun ruh ia ki jingthung jingtep bad kaba la wanrah jingma ia ka jingim briew.
Kumta lyngba kane ka hukum ka SDO (Civil) kala khang pyrshah ia ka jingthang pathar ia ki kynja phlang, ki dieng bad u dewiong ha ki jaka khlaw ne lum phlang, ha ki park, ha ki jaka ba don jingthung jong ki riew paidbah ne ki riew shimet bad wat ha ki jaka lum baroh kiba don hapoh ka thaiñ Sohra Civil Sub-Division.
Kane ka hukum kan treikam noh naduh ba la pynmih ia ka ha ka 12/01/2024 tad haduh ban da pynmih da kum wei pat.