Ka District Magistrate jong ka East Khasi Hills District kum shi bynta ban bud ia ki hukum ba la bthah da ka National Green Tribunal (NGT) Principal Bench, New Delhi, kala pynjari da ka kyndon 144 CrPC ha baroh ki bynta jong ka District, ban iada ia ki um ki wah kiba la shah ktah na ka daw jong ka jingtihmaw bad khlong syiap pathar.
Katkum kane ka kyndon la khang pyrshah ia kino kino ki riew shimet ne ki company ba tih maw beaiñ ha ki sharinglum ba don ha rud jong kino kino ki wah hapoh East Khasi Hills. La khang ruh ia kino kino ki riew shimet ne ki company ban khlong ia u shyiap napoh ki wah khlem da ioh jingbit na ki tnad sorkar kum Mining License lane ka Quary permit bad kiwei de ki Clearance Certificate ba ai lyngba ka EIA Notification 2006 of MoEF&CC, Government of India.
Ka kong Isawanda Laloo, IAS, District Magistrate East Khasi Hills District, kala pynpaw ba ka jingiohlad jong ki riew shimet ne ki company ban tihmaw pathar ha ki sharinglum ba don harud jong ki wah kala wanrah ka jingduh jong ki jingthung jingtep, ka pynsniew ia ki tyllong um bad pyniap ia shibun ki doh um doh wah. Kane kala wan rah ruh ka jingjakliah ia ki um ki wah kat haduh ba ym lah shuh ban pyndonkam ia ki kum ki umbam umdih. Kumta nangne shakhmat lada lap ia kino kino kiba ialeh pyrshah ia kane hukum yn pynshitom ia ki katkum ki kyndon aiñ.