Pynjari kyndon 144 CrPC u DM ha ka jaka ba khajia hapdeng ka Maskut bad Tyrchang

U District Magistrate ka West Jaiñtia Hills District u bah B.S. Sohliya, IAS ula pynbna ba la pynjari da ka kyndon 144 CrPC ha kawei na ki jaka ba mih ka jingïakhajia hapdeng ka shnong Maskut bad ka shnong Tyrshang na ka daw ka jingpom ïa ki dieng kseh ha ka jaka ba la tip kum ka Rashi Tyndem.
Halor kane ka jingïakhajia la ujor ejahar bad la dep ruh ban register kes hapoh ka ïing bishar jong ka Executive Magistrate, da kaba pynhap hapoh ka U/s 107 CrPC ïa baroh ar ki Waheh Shnong ba ki ym bit ban wanrah kino kino ki jingklumar ha katei ka jaka.
U District Magistrate ula pynjari syndon ïa kane ka hukum 144 CrPC ha ki bynta katei ka jaka ba la khot ka Rashi Tyndem da kaba khang pyrshah ban ïalum paidbah palat ïa ka 5 ngut shaneng, la khang ruh ban rah ïa kino kino ki tiar pynmynsaw da ki kynhun ne ki riew shimet, la khang ban pom dieng, lane kit ïa ki mar khlaw na katei ka jaka ba ïakhajia.
Kane ka hukum kan trei kam noh mardor naduh hynnin ka sngi 20 tarik u Jylliew tad haduh ban da pynbna ïa ka da kumwei pat.