U District Magistrate, ka West Jaiñtia Hills hadien ka jingïoh jingujor ba ki nongshong shnong ka Umshangiar, Raij Tamu, Elaka Nongjngi, kim shem la bud ïa ka hukum bala pynmih da u W.K. Kharbuli, MCS, Executive Magistrate West Jaiñtia Hills District katkum ka jingujor Case No. 11/2023 U/S 107/145 CrPC. Katkum ka jingïoh report na ka Saitsama OP West Jaiñtia Hills ba kitei ki nongshong shnong ka Umshangiar ki dang bteng ban leit pom ïa ki dieng ki siej wat hadien bala don ka jingujor mukot duma kaba ïadei bad ka jingïaknieh jaka hapdeng ka shnong Lumlakhiat bad ka Umshangiar.
Katkum ka report na ki pulit la pynsngew kala don ka jingpynkheiñ ïa ki kyndon aiñ ba la dep pynbna ha kitei ki jaka khajia pud kata ha “Lum Khohskhen”, “Lum Mynsiang” bad ha “Um Saitshyieng” jong ka Raij Tamu, Elaka Nongjngi West Jaiñtia Hills District;
Kumta ban wanrah ïa ka jingshong suk shong shngaiñ bad ban lait na ka jingjia ba sngewsih ha kitei ki jaka, na ka liang u District Magistrate, ka West Jaiñtia Hills u bah B.S. Sohliya, IAS, District ula pynjari syndon da ka hukum hapoh ka Section 144 CrPC kaba khnang pyrshah ban ïalum paidbah shi jaka palat ïa ka san ngut shaneng.
La khang ban rah ïa ki tiar pynmynsaw bad kane ka hukum kam shem la treikam na ka bynta ki pulit kiba don ha ka duty.
La khang ban pom ïa ki dieng ki siej, ka jingleit pynkhuid ïa ki jaka ki puta lane kino kino ki kam kiba pynkheiñ ïa katei ka kyndon aiñ.
La khang ban rah ïa ki kurat bad ki wait kiba pyndonkam ha ka ban pom ïa ki dieng ki siej ha ki bynta jong ka jaka ba khajai.
La khang ban ïaid ki kali ha kitei ki bynta da ka jingthmu ban leit pynkhyllem ïa ki dieng ki siej, lait tang ki kali pulit ki ban pyndep ïa ka kamram duty jong ki.
Kane ka hukum kan treikam mardor ha kitei ki bynta ba ïakhajia pud kynthup ha LumKhohskhen”, “LumMynsiang”, bad “Um Saitshyieng”, kiba dang hap hapoh ka Raij Tamu, Elaka Nongjngi West Jaiñtia Hills District.
Kino kino kiba pynkheiñ ïa kine ki jingmana ki lah ban shah pynshitom katkum ka kyndon jong ka Section 188 jong ka IPC. Kane ka hukum kan treikam mardor tad haduh ban da pynbna da kumwei pat.