Ka klob Shillong Lajong ka la sdang ia ka samoi ialehkai jong ka lympung Meghalaya State League (MSL) 2024, da ka jingjop don burom ha kaba ka la thep ia ka 7Wasa da 9-0 ha ka jingiakhun ba la pynlong ha Wahiajer Multi Sports Complex, West Jaintia Hills.
Ia kane ka lympung la pyniaid da ka Meghalaya Football Association (MFA) ha ryngkat ka jingiatreilang bad ka Meghalaya Sports and Youth Affairs (MSYA). Ka Lajong bad Wasa ki dei ki kynhun ba la shah kynthup ha ka Group E.
Ha katei ka jingplie pyrda ia kane ka lympung kaba heh, la wan ban don ryngkat da u symbud Myntri Rangbah ka jylla, Bah Sniawbhalang Dhar, Bah Hamlet Dohling (President Meghalaya Football Association), Bah John Kharshiing (President Meghalaya State Olympic Association) bad kiwei kiwei.
Ia kitei ki 9 kol na ka bynta ka Lajong la ioh ban thep da u Deibormame Tongper (3 kol), Mebannnangkiew Thabah (2), Yohan Benjamin (1), Iohborlang Lyngdoh Lyngkhoi (1), Baby Sunday Marngar (1) bad 1 kol na u Emanbha Marbaniang.
Ka jingiakhun na ka bynta kane ka lympung yn bteng biang ha ka 28 Tarik mynta u bnai ha kaba ka Chipakkore FC kan iakhun pyrshah ia ka Atong Matgrik FC ha ka por 2:00 PM ha Tura.
Katkum ka khubor kaba la iohlum la iathuh ba kiba bun na ki nongpeitkai ba pyndap ia ka madan ki dei ki nongkyrshan jong ka 7Wasa, dei hadien ba ka kynhun kala shah pynbam bun kol ha ka Shillong Lajong bun na ki nongkyrshan kim shym la ap shuh haduh ba kut jong ka jingialehkai hynrei kila nang iamih uwei hadien uwei pat.
