Ka ding kaba jur bha ka la klang ha ka 26 tarik, mynstep pdeng synñia hapdeng ka por 1:00 haduh 1:30 baje kaba la jia ha shnong ka 4 (Soo) Kilo, East Jaiñtia Hills District, kaba la pynjulor lut ïa kawei ka dukan bad wanrah ka jingduhnong kaba khraw.
Ka kong Tillda Bamon, kaba la pynïaid ïa kane ka dukan la palat 28 snem, kala ïathuh ha ba ka la suba ba ka jingklang ka lah ban dei na ka short circuit. Ki paidbah kiba ïaid lynti ki la ïohi nyngkong ïa ka ding bad kila pynkhie ïa ka ha kaba kala lait salit na ka jingjia ba sngewsih.
Haba la kheiñ ia ka jingduhnong ha kane ka jingjia pluh ding ka la kot haduh kumba ₹1.8 lakhs, kaba kynthup ïa ka refrigerator, ki tiar shet bad kiwei ki mar hapoh dukan. Ym don mano mano ba mynsaw ha kane ka jingjia.
U Govinda Rajbongshi, uba sah ha katei ka jaka, ula ong ba u dang ioh thiah, hynrei u la kyndit ha ka por ba u la ïohsngew ïa ka jingïam jong ka kong Tillda. U Govinda u la suba ruh ba ka ding ka lah ban sdang na shabar ka ïing ba lehse da ka jingthang lum ki paidbah. Ki pulit bad ka tnat Fire & Emergency ki la poi hapoh 30 minit, kiba la pyrshang ban pynlip ïa ka ding haduh palat saw kynta.
U trai jaka, u Farewell Bamon, haba kren lyngba ka phone, ula ong ba um don kano kano ka jingsuba sniew bad ula kheiñ ba ka jingjulor ka long kumba ₹20 lakhs, kaba kynthup ïa ki dieng bala buh, ki tank um, ki tiar shet bad kiwei ki mar.
Na ka liang ka kong Tillda kala kyrpad ïa ki bor sorkar ban ai jingïarap, namar katei ka dukan ka dei tang ma ka, ka lad jingïoh kamai jong ka.
