Hadien ba ioh jingtip ia ka jingdon ba thung beaiñ ia u ganja ha ka shnong Laitlulong, Sohiong, ki bor District ha ryngkat bad ki Pulit ka East Khasi Hills District, Anti Narcotics Task Force ki ophisar ka tnad forest bad Excise hynne ka sngi ka 21 tarik u Risaw, 2025, ki la hiar sha katei ka shnong ban pom bad jynrat ia u ganja ba la thung ha ki katto katne ki jaka ha katei ka shnong kaba don ha Sohiong.
Ha kane ka jingleit pom bad jynrat ia u ganja la ia sakhi ruh da ki nongialam shnong ka Laitlulong. Ia une u ganja la thep ha ka trok bad ki pulit kin sa thang noh ia u.
Ha kaba iadei bad kane ka kam thung ganja ki pulit kin dang tohkit bad kem ia kiba dei trai. La ioh jingtip ba bun na kine ki jaka ki dei jong ki riewshimet bad ki pulit ki dang lum jingkhein ruh ba haduh katno acre ka jaka la pyndonkam ban thung ia une u jingdih pynbuaid.
