Ki nongialam jong ka Khasi Student Union (KSU) Lapangap Unit, mynta ka sngi kila leit ai da ka dorkhas ha u Deputy Commissioner jong ka West Jaiñtia Hills District, u bah B.S. Sohlyia, haka jingiadei bad ka jingjia ha kine ki khyndiat sngi ba la dep, ha kaba ki nong Karbi ki la wan ban pynjulor bad pynjot ia ki dieng kiba la thung da ki nongshong shnong ka Lapangap haduh 20 hajar tylli ki tynrai dieng ha ki khappud jong ka shnong Tahpat. Ia kine ki tynrai dieng ka shnong ka la ioh lyngba ka skim jong ka Meghalaya Basin Development Authority, Jowai.
Kane ka jingleh jubor jong ki Karbi ka long ha ka 12.07.2023, ha kaba u Augustine Hanse uba la lam khmat ia ki paidbah Karbi na Tahpat bad ki shnong ba marjan ryngkat ka jingpahara ki pulit Assam bad wan beit beit ha kitei ki bynta ba la thung ia ki dieng ka jaka kaba dang hap hapoh ka jylla Meghalaya jong ka shnong Lapangap ha kaba ki la pynjulor naphang ia kitei ki dieng ba la dep thung.
Kumta ha ka jingiadei bad kane ka jingleh jubor jong ki Karbi na ka liang ki nongialam ka KSU, mynta ka sngi ki la kyntu jur ia u khlieh ka District ba un shim khia ia kane ka kam, lym kumta ka seng kan nym shong kli kti bad kan iaid da kawei ka lynti ha ka jingiadei bad ka jingiada ia ka khyndew ka shyiap jong ka ri bad ka jait bynriew.
