Ka jingther jong u lapbah lapsan ha kine khyndiat sngi bad ka jingjur shaba palat mynta ka sngi ha ki bynta jong ka Ri lum Jaintia kala wanrah ia ka jingduh bad jingjulor ki lynti ki synkieng, ka jingshlei um, ka jingtwa khyndew ha ka surok bah kaba la pynthut ia ka leit ka wan jong ki kali motor bad wat ia ki briew ruh kumjuh.
Ia kine ki jingshlei ki um ki wah bad ka jihngtwa khyndew la sakhi ha ki lynti synkieng kiba don sha ki thaiñ Narpuh jong ka East Jaintia Hills District, kumjuh ruh ha ki thaiñ Ri War Jaintia kum ha ka shnong Amsohkyrchong, Hingaria, Kwator, Demlakang, Natbor, Borkhat Kamsing, Kharkhana, Kamsing, Pasadwar, Lum Pyngngad bad kiwei kiwei.
Kane ka jingther jur jong u lapbah mynta ka sngi kala wanrah ia ka jingshlei um ia ka surok Rymbai, Bataw, Borghat Jelalpur uba la tip kum u RBBJ Road, ha kaba la don ka jingsahkut ha u surok na ka daw jong ka jingtwa jong ka khyndew bad ka jinghap jong ki maw kaba la pynpait ruh ia u hump pipe jong ka surok kaba la pynthut ia ka leit ka wan jong ki paidbah ka thaiñ.
Ha ka jingiadei bad ka jingthuh jong u surok RBBJ na ka liang ka seng Southern Border Youth Welfare Association (SBYWA) East Jaiñtia Hills District, kala kyrpad ia ka tnat PWD East Jaiñtia Hills District, ba kan pynkloi ban pynkhuid ia ki khyndew bad ki maw kiba la kah ia ka surok bad leh ia ka ba donkam khnang ba ki paidbah kin lait na ka jingeh.
