Ka Hynniewtrep Achick Natinal Movement Front (HANM) mynta ka sngi 13.10.2021, ka la ioh ban pynkha sa kawei ka tnat ba treikam ba thymmai ka jong ka ha ki thaiñ War Jaintia kaba la tip kum ka HANM War Jaintia Circle.
Mynta ka sngi ha kane ka jingialang pynkha ia ka HANM War Jaintia Circle, la donlang u President rangbah ka seng u bah Lamphrang Kharbani, bah W. Sohtun Assistant General Secretary HANM Central Body, ma Monki Shylla Vice President East Jaintia Hills District, bah Wankishwa Mawlong General Secretary WJHD, ma Comming Dkhar President East Jaintia Hills District, ha ka jingialang ba la pyniaid da u bah Rimitre Lakiang Organising Secretary WJHD bala pynlong Dawlupaya Khyriem Stay Home kaba don ha Ladjaplem Amlarem. .
Mynta ka sngi la pynbam smai ia ki dkhot ka HANM War Jaintia Circle ba dang pynkha thymmai la pyndep da u President ka seng u bah L. Kharbani bad la ioh ia ki jingkren pynwai da u President ka HANM War Jaintia Circle u bah Wanbiang Lakuna. Mynta ka sngi ki dkhot ba pyniasoh sha kane ka seng ki don haduh 30 ngut nalor ki nongkit kam ka Executive Commitee, kiba kynthup ia u President bah Wanbiang Lakuna, Vice President bah Meshan Kasar, General Secretary bah Arki Shylla bad kiwei de.
U bah Lamphrang Kharbani haba kren, u la ong ba ka seng ha ka jingiadei bad u pud u sam kumba long mynta ka seng ka dang ap ia ka jingpynbeit pud jong ka jylla Meghalaya bad Assam haduh ban da dep, hynrei lada ka jingpynbeit pud jong ki kam poi shano shano ka seng kan sa leh hi ia ki kam ba donkam ha ka jingiadei bad u pud u sam. U la ong ruh ba ka jylla Meghalaya ka shah kyntur pud ym tang ha ka jylla Assam hynrei wat ha ka Ri Bangladesh ruh, kumta ka HANM ka la long kaba la pynkhreh lada ka sorkar ka don kam ia ka seng ban beh ia ki khar Punjabi kiba don ha Shillong.
U la ong ruh ba kumba ka seng ka ieng ha ka nongrim ban iada ia u pud u sam bad ka khyndew ka shyiap jong ka ri bad ka jait bynriew kumta haduh mynta hi ka seng ka ieng skhem ha kane ka nongrim ban iada ia u pud u sam jong ka jait bynriew, u la ban biang sa shi sien ba ka seng ka kloi ban iarap ia ka sorkar ha kano kano ka por ba ka don kam ha ka ban weng ne beh ia ki Kharmetor kiba don ha Them iew Mawlong Shillong. Na ka liang ong u la kyntu ia ki dkhot jong kane ka Circle ba thymmai kaba don ha ki thain khappud bad ka ri Bangladesh, ba kin long kiba trei naduh ka mynsiem ban iada ia ka ri bad ka jait bynriew ban nym ai lad ia kiwei pat ki jait bynriew ba kin ioh ban wan iuh roit ia ka ri bad jaidbynriew.
