Ka seng kur Dkhar West Jaiñtia Hills District Unit hynnin ka sngi ka ka la ïoh ban pynkha ïa ka shnat treikam jong ka ha ka shnong Ksehrynshang bad la ïoh ïa ka jingkren lyngkot na u Hamjhan Dkhar uba dei u General Secretary jong ka seng kur Dkhar Central Body bad haba ai ïa ka jingkren u la ïaroh ïa ki nongkitkam kiba rim kiba la seng ïa kane ka seng kur ba kin lait na ka shong sang shong ma bad ha kajuh ka por ka seng kur Dkhar kumba ki nongïalam ki la ju kren na ka por sha ka por, ka kur Dkhar ka don beit tang kawei.
Wat lada ka kur Dkhar ka don sha kiwei kiwei pat ki bynta ka ri bad ka rukom sin ïa ka ruh ha la ki jong ki jong ki jaka ki long da kum wei pat, hynrei ha ki kot ki sla ka kyrteng ka dei beit jait Dkhar.
La ïoh ruh ïa ka jingkren na u Vice President ka EJHD u Bah Shaniah Skem Dkhar bad na ka liang ka jong u ruh u la ong ba ka kur kam dei ban sngew pher jaid bynriew lane ban ïa sngew pher niam, u la ban shuh shuh khamtam na ka bynta ki khun kiba la ïoh ïa ka khusnam mynta ka sngi ba ki dei ban ïai minot ha ki kam ki jam ki jong ki bad ruh ban im tip briew tip Blei bad ban poi sha thong. Na ka liang ka jong u, u la ong ruh ba ka kur Dkhar ka thrang shisha ban don ïa kita ki Ophisar kiba heh kyrdan khamtam ha ki kyrdan IAS, IPS bad kiba pher ba pher.
La ïoh ban pynskhem ïa ki nongkitkam ka shnong Ksehrynshang WJHD na u President Rangbah ka seng kur Dkhar Centrai Body Bah Harvis Dkhar bad na ka liang ka jong u, u la ai ïa ka jingsneng na ka bynta ki kynthei kiba la ïoh lok ba kin burom ïa ki tnga ki jong ki bad ïa ki shynrang ruh kumjuh.
