Ka Bharatiya Janata Yuva Morcha (BJYM) kaba dei ka Youth Wing jong ka BJP, kum shibynta ban pynkhlaiñ ia ka Party naduh ki thaiñ ba kyndong na ka bynta ka elekshon MP sha ka Lok Sabha ka ban sa long ha u snem ban wan, kala thung ia u Deepan G Momin bad Akki M Sangma kum ki Vice Presidents, u Joydeep Ghosh bad Anish M Sangma kum ki General Secretaries, u Koster Diengdoh kum u Secretary bad u Varun Kumar kum ki Treasurer nalor ki 6 ngut ki ban long ki Executive members.
Kum shi bynta na ka jingiaid lynti ba 9 snem jong ka sorkar u Modi ka Yuva Morcha kala ioh ban ia kynduh ia ki samla kiba dang ioh ban thep vote nyngkong lyngba ka prokram jong ka ka Mahasampark Abhiya. La pynlong ruh ia ka online quiz ha ka 24 bad 25 tarik halor ka jingjop jong ka BJP ban ialam ia ka sorkar NDA. Ha kane ka prokram la don ki samla na ka Jylla Meghalaya kiba la iawan iashim bynta bad kila ioh ruh ia ki Certificate hadien ka jinglehbha jong ki.
Ha une u bnai ban wan ka BJYM kan sa leit sha kylleng ki District bad ki Mandal Unit na ka bynta ban pynlong ia ka jingpynrung kyrteng ia ki samla kiba don jingthmu ban trei na ka bynta ka Party sha kane ka Elekshon Lok Sabha. Kan sa don ruh ka jingbatai shaphang ka skhim kaba la wanrah da ka sorkar u Modi ka ba lah ban ai jingmyntoi ia ki samla jong ka Jylla, lyngba ka Rozgar Mela kaba dei shi bynta na ka jingkular jong u Prime Minister ban pynioh jingtrei haduh 10 lak ngut ki samla ka ri hapoh kine ki snem ban wan.
Kane ka long katkum ka kyrwoh khubor ba la phah da u Wankitbok Pohshna, State President BJP Yuva Morcha.