Ki bor District Administration jong ka East Jaintia Hills District ki la pynjur ïa ka jingjurip ne thwet ia ki jaka ba dang bteng ia ka tih dewiong be-aiñ, da kaba la buh haduh 5 tylli ki kynhun (teams) kiba kynthup ïa ki Executive Magistrate, ki Pulit bad ki ophisar na ka Directorate jong ka Mineral Resources (DMR).
Ha kine ki jingleit thwet, la ïoh ban kurup haduh 3197 MT ei ei, u dewiong na 9 tylli ki jaka hapoh Umlawang bad 351 MT ei ei na 4 tylli ki jaka hapoh Umthe.
Ha ka 6 tarik u Rymphang, 2026, ruh la ïoh ban kurup haduh 3,356 MT ei ei u dewiong na 8 tylli ki jaka ha shilynter ka surok Sakhain–Thangsko, ryngkat bad ki tiar ba pyndonkam ha kaba tih dewiong.
Shuh shuh, la lap bad la pynduh ïa ki jaka shong shipor (makeshift camps) kiba la pyndonkam da ki nongtih dewiong be-aiñ ha ka por ba pynlong ïa kine ki jingkhynra. La register ïa ki FIR halor kine ki jaka tih dewiong be-aiñ, ha kaba jingleit jurip ia kum kine ki jaka ka dang iaid sha khmat.
Ha ka jingiadei bad kane la pynmih ia ka hukum hapoh ka Section 163 BNSS da u District Magistrate, East Jaintia Hills District.
