Ki nongkitkam jong ka Meghalaya Football Association (MFA) ryngkat ka jingsynran lang jong u President, Bah Hamlet Dohling mynta ka sngi ka 24 tarik Naitung ki la pynlong da ka program ban kitbok bad ai mynsiem ia ki thei ïalehkai phutbol ka jylla shwa ba kin leit ban iakhun sha ka Jylla Karnataka.
Ha kane ka sngi ki khynnah ki la ïoh ïa ka kabu ban iakynduh markhmat bad ki nongïalam ka MFA bad khamtam ka jinglong lakloi jong u President ban pyllait ia ka por ban iakren bad ai mynsiem ia kine ki khynnah shwa ba kin leit ban iakhun na ka bynta ka lympung ‘Junior Girls Football Championship’ 2024-25 ka ban long ha Belgaum, Karnataka.
Ka Meghalaya ka la shah kynthup ha ka thup D, ha kaba kin hap ban iakhun pyrshah ia ka SAI, Sikkim bad Madya Pradesh.
