Ka Sorkar Jylla hapoh ka jingialam u Myntri Rangbah Conrad K. Sangma, Bah Shakliar Warjri Myntri ba khmih ia ka kam ïalehkai, ryngkat ruh ka jingtrei borbah u Working President ka Meghalaya State Olympic Association (MSOA), Bah John Kharshiing, u General Secretary MSOA, Bah Finely L. Pariat, Bah P.B War Nongbri, Bah K. Passah Assistant Director Meghalaya Sports and Youth Affairs (MSYA) ka sorkar Jylla bad kiwei kiwei ki la dep ban pynkhreh paka na ka bynta ban pynlong biang ia ka Meghalaya Games kaba 6 ha ka jylla naduh ka 20-25 mynta u bnai ha Jowai, West Jaintia Hills District.
Lah ban pynkynmaw ba ha une u snem 2024 baroh shi snem, ka Tnat MSYA bad MSOA ki la pynlong bun tylli ki jingialang ha ka Nongbah bad ha Jowai ryngkat ruh ka jingleit khmih ia ki jaka ïalehkai, ki jaka sah, jaka bam bad ka jingbit jingbiang nadong shadong na ka bynta ban pyntikna ba ka 6th Meghalaya Games mynta u snem kan long kaba seisoh bad kaba jop.
Mynta ka sngi, ka tnat MSYA ka la pyntikna ruh ba ka tarik ban sdang ialehkai kan long naduh 20 Kyllalyngkot hynrei ka jingplie pyrda (grand opening ceremony) kan long ha ka 21 Kyllalyngkot, ha Jowai.
Napdeng 12 tylli ki district, 29 tylli ki jingïalehkai, 6 sngi, kaei ka district ka ban ioh rah ia ka nam Lahduh mynta u snem?. Ka tnat ka khot ka wer ruh ia ki paidbah na kylleng ki Distrik ba kin wan ban ai mynsiem ia ki samla ha katei ka lympung kaba heh ka ban dei ruh ka kabu ban ithuh ia ki sap jong ki samla na ka bynta ban leit ïashim bynta sha kiwei ki pat jylla.