Ka Jowai Trader Association (JTA), kawei na ka seng ki nongshong ïew mynta ka sngi kila pynlong ka jingpynkhuid ïa ki jaka shong ïew kiba don hapoh jong ka Iewmusiang barim bad kumjuh ïa ki ñiut ba la bret pathar ha katei ka jaka.
La leh ïa kane hadien ka jingwan jurip jong ka tnat ka koit ka khiah kiba la bthah ïa ki nongshong ïew ban pynkhuid ïaki jaboh ne ki ñuit kiba don haki bynta jong ka Iawmusiang ba rim.
Na ka liang ka President JTA ka kong Robila Mylliempdah, ryngkat bad ki dkhot kiba dei ki nongshong die jingdie ha Iawmusiang barim ki la pynlong ka jingïa synñiang na ka bynta ban pynkhuid ïa ki jaka balait kiba la kylla long ki jaka bret ñuit, na ka bynta ba kin ïoh pyndonkam ïa kitei ki jaka bad sa kawei ruh ka long na ka bynta ban lait na ki jingsma kaba lah ban wan rah ki jingpang ba har rukom bad ban kham kylluid ka ïaid ka ïeng.
Na ka liang ka JTA ka la leh ïa kane hadien ba ki la pan jingbit na ka District Council (JHADC), na u Deputy Commissioner bad kum juh ruh naka CEO ka Jowai Municipal Board (JMB), DS Iawmusiang, Seiñraij Jowai bad kiwei.
Ka kong Robila haba kren kala ong ba kane ka jingpynkhuid ïa kitei ki jaka ka long ba kin ïoh ban pyndonkam namar kumba long mynta ka ïew Musiang Jowai kala long kaba khapngiah haduh katta katta namar ka jingsah teng ban pyndep ïa ka Iewmusiang Super Market kaba la shu ïeh shrah mynta la bun tylli ki snem.
Sa kawei ruh na ka liang ka District Council kan sa shna ïa ka surok ha kine ki bynta ba shongdie ki nongdie jingdie ha kane ka ïew kumta ka jingpynkhuid ia kitei ki jaka kan long ka jingmyntoi ïa ki nongdie. Katba ïaki ñiut kiba mih nangne pat naka liang ka JMB kala kular ban kit ïa ki, ong ka kong Robila.
Na ka liang ka JTA ka la ai khublei kyrpang ïa u CEM ka JHADC, ophisar ka District Council ba dei peit ïa ki ïew ki hat, CEO JMB, u DC, DS Iawmusiang, Seiñ Raij Jowai bad ki para dkhot baroh kiba la donkti ban ïatreilang ban wanrah ka jingkhuid jingsuba.
