Ka shnong Jaraiñ, hapoh ka Amlarem Civil Sub-Division, West Jaintia Hills District, ka la pynlong ïa ka jingpynkhuid ïa ki rud bad ki kiar jong ka Wah Myrkein, ha ka 18 tarik Nohprah, 2025. Kane ka wah ka don harum shnong Jaraiñ bad ka hap ruh hapoh u pud u sam jong ka shnong, bad ka don ha shilynter ka National Highway.
Ha kane ka jingpynkhuid, la lap ïa ka jingjaboh kaba jur bha namar ka jingbret pathar ïa ki jaboh bapher bapher kum ki bilor, ki plastic, ki bilor kyiad bad kiwei pat ki jait jaboh. La lap ruh ba don ki briew kiba leit kai ne kiba leit khana kiba bret pathar ïa ki jaboh khlem da pyrkhat ïa ka jingktah ïa kiwei pat lane ïa ki tyllong um, kaba lah ban wanrah ïa ka jingma ïa ka mariang bad ïa ka pateng kaban dang wan.
Watla mynshwa kum ka shnong kam ju pynkhuid ïa kane ka wah, hynrei mynta ka sngi, da kawei ka jingmut bad kawei ka jingthmu, ka shnong Jaraiñ ka la shim ïa ka sienjam ban pynkhuid ïa kane ka wah, khamtam eh ïa ka bynta kaba la ker bad kaba la da, da ki khlaw.
Ka shnong Jaraiñ ka la kyrpad ïa ki paitbah, khamtam ïa kiba iaid lynti lyngba katei ka jaka, ba kim dei ban bret pathar ïa ki jaboh sha kane ka wah, namar ka Wah Myrkein ka dei ka tyllong um kaba kongsan bha. Bun ki shnong ki tan um bam bad um dih na kane ka wah bad ka shnong Amlarem ruh ka tan um bam bad um dih na katei hi ka wah.
Ia kane la pynpaw da u Waheh Shnong jong ka shnong Jaraiñ, Amlarem Civil Sub-Division.
