Ka Meghalaya Boxing Association mynta ka sngi ka 24 tarik Nailar 2024 ka la pynkup burom ia 3 ngut kiba wanrah nam ia ka jylla.
Haba ai jingkren sha ki lad pathai khubor ha Press Club u President ka Meghalaya Boxing Association u Bah Cornelius Kharhunai u pynpaw ia ka jingsngew kmen ia kine ki 3 ngut kiba la noh synniang ia ka jylla, kine ki long u Torak Kharpan Coach India na Meghalaya ba ialam ia ka India ha ka Olympic ba dang shu dep shen ha Paris. U Bah Larry Kharpran uba long Technical Director jong ka Meghalaya football Association uba shah jied ban long kum u observer sha Paris Olympic ba dang shu dep shen ha une u bnai Nailar bad ia iwei i khynnah ba wanrah Bronze medal ia ka jylla ha ka 3rd Junior National Boxing Championship kaba la dep ban long ha Greater Noida, Uttar Pradesh ha u bnai March ba lah dep.
Na ka liang kine kiba shah pynkup burom ki pynpaw ia ka jingsngew kmen haba iadei bad kane ka jingshah pynkup burom ki ai khublei ia ka Meghalaya Boxing Association ba ka dang lah ban leh bha ban sei shuh shuh ki rangialehkai kiba ban mihkhmat na ka jylla bad ki kyntu ia ka sorkar ba kan ai shuh shuh ki jaka ialehkai Boxing khnang ban sei ban wanrah shuh shuh ki Rangkynsai ki ban ioh mih khmat ia ka jylla sha ki Jaka ialehkai kiba heh kum ka National Boxing Championship bad kiwei kiwei ki jaka kum ka Olympic.