Ki nongkyrshan ia u ma Kyrmen Shylla na ka 6 Khliehriat (ST) kila pynlong ia ka jingpynkup burom ia u ha Dorbar Hll jong ka shnong Bataw (Umlatyap) hynnin ka sngi bad ha kane ka juh ka sngi na ka liang jong u ma Kyrmen ruh u la ioh ban sam ia ki Work Order sha ki 6 tylli ki kynhun kiba kynthup ia ki seng niam, ki Club, ki skul bad kiwei de.
Ha kane ka jingialang pynkup burom ia u ma Kyrmen Shylla la ioh ka jingkren na u ma Skem Sumer uba dei u Assistant Waheh Shnong ha ka jingiadonlang u Chairman Shnong ka Bataw bad kiwei de ki riew rangbah kynthei bad synrang lem bad ki khun samla ka shnong.
Kiwei de kiba la ai jingkren ki kynthup ia u ma Martin Lyngdoh, Mathew Pajat, Shewani Sumer, Klemen Pajat, Tony Byrloi kiba long ki nongialam bad kitkat hapoh ka shnong ka thaw. Ia ka jingialang la pyniaid da u Waheh Shnong barim u ma Bhalang Suchiang.
Ki nongkyrshan jong u ma Kyrmen ki pynpaw bad kitbok kitrwaing ia u ba un ioh biang ia ka jingjop ha kane ka kynti khnang ba un dang lah shuh shuh ban ai ka jingshakri ia ka thaiñ bad ia ka jylla hi baroh kawei.
Ki nongkyrshan kila pynpaw ruh ba u ma Kyrmen Shylla ula lah ban pynioh surok psiang hapoh ka shnong Bataw kumba 1.68 klur tyngka, ka skul building jong ka shnong Bataw Nein Govt. L.P. Skul ha ka jinglut kaba Rs.37 lak tyngka, ka view point kaba Rs.10 lak tyngka. La pynpaw ruh ba da ka jingtrei shitom jong u ma Kyrmen la lah ruh ban plie ia ka Bataw PHC ha u snem 2020 nalor kiwei de ki kam bad ki lad jingiarap kiba ula pynioh ia ka shnong ka thaw. Kila pynpaw ba u ma Kyrmen u long u briew uba don ia ka mynsiem ban iarap ia kiba duk ba kyrduh kumta kin ialeh shitom ban pynjop biang ia u.
Na ka liang jong u ma Kyrmen u pynpaw ia ka jingsngewkmen ban iohi ba ki nongshong shnong jong ka shnong Bataw khamtam ki nongkyrshan jong u ki long ki briew kiba lah ban shaniah bad u sngewthikna ba kiwei pat kiba bun ba lang ruh da ka jingieit kin jied biang ia u, khnang ba un ioh ban pyndep ia kiwei pat ki kam ba dang sah hapoh ka shnong bad ha ka Constituency ruh.
