Ka seng All Jaintia Muster Roll Workers & Labour Union (AJMRWLU) lyngba ka Central Executive Committee (CEC), ha ka jingiatreilang bad ka Union Cook-Cum- Helpers PM Poshan (Mid Day Meal) Meghalaya, mynta ka sngi kum ka dak jong ka jingrakhe dap 8 snem jong ka seng, ki la pynlong ka jingpynkup burom ia u Myntri Rangbah ka jylla u Conrad K Sangma, ha ka jingdonlang lang u Symbud Myntri Rangbah ka sorkar jylla u ma Sniawbhalang Dhar. Ia ka jingialang la pyniaid da u General Secretary AJMRWLU u ma Dapherborn N Suchiang.
Ha kane ka sngi la donlang ruh u Deputy Commissioner WJHD bah B.S. Sohliya, u Superintendent of Police WJHD ma Chemphang Syrti, u Founder bad Adviser AJMRWLU u ma Khroo Lam Pariat, President AJMRWLU kong Dayoo Iakai, President UCH PM Poshan kong Banalis Syiem, ki dkhot jong kine ki ar tylli ki kynhun na ka kylleng ka jylla.
Na ka liang ka Union kala ai ruh ia ka Memorandum ha u Myntri Rangbah ka Jylla bad pynpaw ia ki jingdonkam jong ka Union.
Na ka liang u Myntri Rangbah Conrad K Sangma haba kren ha kane ka sngi ula pynpaw ia ka jingkmen kaba khraw ha ka jinglah jong u ban iadonlang ha kane ka sngi dap 8 snem jong ka Union bad ka jingpynkup burom ia u.
Haba jubab halor ia ki jingdawa jong ka Union kiba kala kdew ha ka Memorandum, u Myntri Rangbah ula pynsngew ha ki dkht ka Union ba na ka liang jong u bad ka sorkar kin shim khiah ia kine ki mat jingdawa, khamtam ha ka jingsiew jingtda ia ki nongtrei jong ka Union, kiba trei ha ki Department bapher bapher ba ki dei ban ioh ia ka bainong ha ka por kaba biang.
