Ka Seng jong ki nongshetja sngi ha ki skul ha ri lum Jaintia, ka All Jaintia Midday Meal Worker Association ha ka 26 tarik May kala pynlong ia ka jingialang ba kyrpang ha Yungwalieh ka Panaliar bad ha kane ka sngi la pynlong ruh ia ka jingpynkup burom ba kyrpang ia u samla rangbah u Khroo Lamsalanki Pariat, Adviser AJMDMWU.
U Jerry Anderson Suting, President, AJMDMWU ula pyniaid ia ka jingialang bad ai ia ki kyntien pdiang burom bad ka jingnguh Blei. Kiwei de ki rangbah kiba iadon lem ha kane ka sngi ki kynthup ia u ma Deibormi Syngkon, Waheh Chnong Tpep-Pale, u Damehiwothi Pde waheh Chnong Chilliangraij.
La ioh ruh ia ka jingkren ai mynsien ia ki dkhot ka All Jaintia Mid-day Meal Worker Union da ka kong Banalis Syiem, President Ribhoi District Mid-day Meal Worker Association kumjuh na u ma Longda Bamon In-charge Min-Day-Meal Thadlaskein-Laskein Block.
U ma Longda u la ong u katba u la pyrshang ban leh ia kaba bha tam na ka bynta ka jingmyntoi jong ki khynnah skul bad kumjuh ruh jong ki Nongshetja sngi. Ula pynkynmaw ba ka sorkar kala lah ban pynkiew ia ka honorarium jong ki sha ka 2 hajar tyngka bad nalor kane kan sa siew ruh ia ka Arear kaba 8 hajar tyngka.
Ka Banalis Syiem, President Ribhoi District Mid-day Meal Worker Association ha ba ai jingkren kala pynpaw ka jingsngewnguh kaba khraw ia ka AJMMWU bad kyrpang ia u ma Khroo Lamsalanki Pariat u briew uba shemphang ba iohi jngai bad uba ai mynsiem uba trei na ka bynta ka hok jong ki nongshet ja sngi ha ki skul.
Kum ka dak ban pynkhraw ia kane ka sngi ki Block bapher bapher hapoh ka lam jong ka AJMMWU kila shim ia ka kabu ban pynkup burom ia u ma Khroo Lamsalanki Pariat kum ka dak ka jingsngewnguh sngewburom ia ki kam uba ula leh ba ka mynta ka jingmyntoi jong ki. Nalor kane kala don ruh ka jingpynkup burom ia ki Waheh Shnong bad ki dkhot jong ka AJMMWU kiba long ki nongkyrshan ba radbah ban pyniaid beit pyniaid ryntih ia ka seng na ka por sha ka por.
U Khroo Lamsalanki Pariat haba kren ha kane ka sngi u ong ba ka jinglah ban pynlong ia kane ka sngi ka long namar ka jingiatreilang jong ki briew sorkar kiba dei peit ia ka Midday Meal, kumjuh ki Seng bapher bapher kiba la trei na ka bynta ka bha ka miat bad ka jingmyntoi jong ki nongshet ja sngi. Kumta u kyntu ia ki baroh ba kin don ia ka mynsiem iatreilang da kaba iarap markylliang khnang ba ki jingthmu jong ka seng kin long kiba jop.
