Ka Bouncer Association of Meghalaya (BAM) Jaiñtia Hills mynta ka sngi ka la ioh ban pynkup burom ia ki 24 ngut ki samla kynthup 11 ngut ki kynthei bad 13 ngut ki shynrang kila pyndep ïa ka jingshah hikai ban long kum ki ‘Security Guard’ ba pura.
Ia kane ka jingpynkup burom la leh mynta ka sngi Saitjaiñ 23 tarik u Lber, 2024 haka jingïalang ba shongkun bala pynlong ha ka jaka ai jinghikai ka BAM-JH ha Tlane Mynkjai ba don harud u surok Dawki-Jowai, ka jaka ba dei trai jong u Dalloi ka Elaka Jowai ma Puramon Kynjing.
Kitei ki samla kiba la dep shah hikai ha ka kam Security kan wanrah nyngkong ïa ka jingshongsuk shong shngaiñ haki bynta bapher bapher da ka jingpahara jong ki. La sam bad pynithuh ïa ki da ki Syrnod jong ka Association ha kaba kin ïoh ban apply ïa ki kam ki jam ha kino kino ki ophis sorkar (Government Dept.) ne ki jong ki riew shimet (Private).
La pynkup burom ïa kitei ki samla 24 ngut da u kongsan uba dei u Dolloi ka Elaka Jowai ma Puramon Kynjing bad ula pynher ruh ïa ka lama ka Association, haka jingdonlang u symbud kongsan ma Army Lipon President Synjuk Waheh Shnong Ri-Lum Jaiñtia, u OC ka Jowai Police Station ma S. Manner, u Iahmioo Khyriam Adviser ka BAM, ki Waheh Shnong bad kiwei de kiba la shah khot sngewbha, nalor ka jingdonlang ki kmie ki kpa jong ki khynnah ba shah hikai.
Na ka liang u kongsan ha ka jingkren ula ai ka jingïaroh kyrpang ïa u nongseng jong ka Association uba long ruh u President jong ka u ma Yoosar Kynjing uba don shisha ka mynsiem trei shitom ban wanrah kum kane ka kynhun ban pynïoh kam ïaki khun samla.
Ula pynsngew ruh ka long kaba donkam eh haka jingim ban don ka akor ka burom bad ka jingim bha im miat, khnang ba hadien habud kiwei kin ïoh ban ithuh ïa ki kam naduh na ïing, ha ka imlang ka sahlang bad ha ka Ri hi baroh kawei.
Shuh shuh ula ong “ka kmie kaba hakhlieh duh bad kaba ieit tam dei ka Ri-India bad ka kmie kaba don ha mynsiem ka dei ka kmie ba kha ba pun bad kaba pynheh pynsan ïa ki khun”. Ula ong ka jingïoh hikai jong ki samla na kane ka Training kan sa long kum ka duriaw bah ba kin shemphang ha ki kam ki jam, nalor ka jingkoit jingkhiah.
U Dalloi ula kyntu ba kum ka Association kaba nyngkong dei ban don ka jinglong ba bha haka akor burom bad ka dur khmat phuh samrkhie, “Ka spah bad ka burom ki dei ar tylli ki bynta ha ka jingim hynrei kaba kordor eh haka jingim dei ka burom kaba long ka jingkyrkhu bad ka nam”.
U ma Army Lipon ha ka jingkren u ai ka jingkyntu ïa ki kmie ki kpa ban kit peit bha ïa ki khun ki kti ban im bha im miat, ula la ïaroh ïa ka BAM kaba long kum ka jingkhang ban plie lad ïa ki khun samla ha ka ïoh kam ïoh jam, wat ha ki kharkhana pynmih Dewbilat kiba wan seng hapoh ka Ri-lum Jaiñtia kine ki samla ki dei ban ïoh kam kum ka lad ban pynduna ia ka jingdon ki bar jylla.
Ha ka juh ka por ula kyntu ïa kane ka Association ha kine ki sngi ban wan ba kan pynlong ïa ki prokram ai jingpynsngewthuh (Awareness) ha kylleng ki shnong ki thaw khnang ba ki khun samla ki lait na ki jingdih ba sniew kum ka kyiad bad u Drug.
U ma S. Manner (OC) ula ong donkam ban don ka akor ka burom namar khlem ka akor burom ym donkam satia haka jingim, ula khmih lynti ba lyngba kane ka Training Center ki samla kin ïoh shibun ki jinghikai ban im ha ka jingshemphang da kaba ong ïa ki kyntien “sian kum u bseiñ jemnud kum ka paro”,
Ula buh ruh ka jingkyntu ïa ki kmie ki kpa bad ïa ki khun samla ban kiar na ki kam thok kam shukor naduh ka rukom dawa pisa kiba wan na ki bor Internet lyngba ki mobile phone.
La pynsngew da ki nongïalam ka BAM-JH kane ka dei ka sien ba nyngkong 1st Batch ïa ka BAM-JH ban shim ïa kane ka jingai jinghikai ïaki samla 24 ngut ban long kum ki Security Guard, da kaba kitbok kitrwiang ba kin ïoh ïa ki kam ki jam jong ki ha ki ïew ki hat, ki ophis bapher bapher bad kumjuh ha ki kam sorkar.
La pynshong shit shuh shuh ïa kane ka sngi da ki jingrwai bad ki jingshad na ki dkhot ka Association la ïoh ïa ki kyntien pdiang sngewbha ha kane ka prokram da ka Rihok Sumer, General Secretary bad ki kyntien ai khublei na ka Corita Langbang, President Women Wings BAM-JH.
