Jowai : Mynta ka sngi ka ophis jong ka District Animal Husbandry & Veterinary Officer West Jaiñtia Hills District, Jowai ha ryngkat ka jingiatreilang bad Hills Farmers’ Union (HFU), Thadlaskeiñ kila pynlong ia ka jingpynkup burom ia uwei u rangbah Foreme Kharsahnoh uba dei na ka shnong Sohphoh halor ka jinglah jong u ban shna hi ia ka kor pdeng pylleng syiar tang da ka ba pyndonkam ia ki tiar ba ioh na ka sawdong sawkun.
Ia ka prokram la pynlong ha Conference Room jong katei ka ophis ba la pyniaid da u Dr. D.I Kjam District A.H Veterinary Officer, ha ka jingdonlang u kongsan Deputy Commissioner ka WJH ma Garod LSN Dykes IAS, u Dalloi ka Elaka Jowai ma Puramon Kynjing, u BDO ka Laskeiñ Block ma B. Chyrmang bad nongrep kiba long ki nongioh myntoi na West Jaiñtia.
U bah Forme ula lah ban shna ia kane ka kor kaba lah ban pdem pylleng syiar haduh 700 tylli shisien pdem, ula ong ba ia kane ka kam u la sdang naduh u snem 2019 hynrei ha ka jingpyrshang jong ula ia kynduh shibun ki jingeh ban wad ia ki jingtip lyngba ka Internet.
U Deputy Commissioner ka WJHD u ma Garod LSN Dykes haba ai jingkren ula ong ba kane ka dei ka sngi ban sah jingkynmaw ia u ma Foreme Kharsahnoh bad kumjuh ia District hi baroh kawei. Ha ka juh ka por u DC u kitbok kirwiang ia u ma Foreme ba un nanglah ban pynbha shuh shuh ia kane ka kam, da kaba ula pynsngew ruh ba na ka liang ki bor District kin pyrshah ban wad ki lad ki lynti na ka bynta ban pyntip ia ki skim bapher bapher kiba iadei bad ka kam rep kam riang. Hadien jong kane ka prokram la don ruh ka jingsam ia ki kor at phlang ban shna jingbam ia ki jingri ia kaba ki nongrep ki lah ban pyndonkam da kaba suk ia katei kor ot phlang.
