Kum shi bynta ban pynshlur bad ai Mynsiem ia ki khun samla pule jong ka Shnong, ka Dorbar Shnong Pamrakmai ka la pynlong ia ka prokram pynkup burom bad ai khusnam ia ki khun samla pule ki ba la pass ha ka Kyrdan SSLC, HSSLC bad ki Graduation Examination jong une u snem 2022 kiba don 20 ngut.
Ha kane ka Prokram la wan sakhi da u ma Kyrmen Shylla MLA ka thaiñ kum u Kongsan ryngkat ha ka jingiadonlang ki Nongkitkam Shnong, ki Nongshah khot sngewbha, Ki Nonghikai Skul, Khynnah Skul bad ki paidbah nongshong shnong hi baroh kawei.
Ha ka jingkren kum u Kongsan u ma Kyrmen u la ai ka jingiaroh ia ka Dorbar Shnong ba ka la pynlong ia kum kane ka prokram kaba donkam eh kum ka nuksa ban pynshlur bad ai Mynsiem ia ki Khun Samla pule jong ka Shnong ki ba la ioh ia u soh jingjop bad ki ba dang don ha jingpule bapher bapher. U la kyntu ruh ba ki dei ban nang trei minot ha ka jingpule ban poi sha ka thong jong ka jingjop.
Shuh shuh ula pynsngew ba kum u Nongmihkhmat u la pyrshang ban iarap bad lehbha ia ki donkam ha ka roi ka par jong ka Shnong.
Ha kane ka sngi la aiti ruh ia ka Memorandum halor ka jingkyrpad ban iarap pynioh ïing Dorbar Shnong ba thymmai bad Street Light bad ruh u la kular ban iarap ban wad ki lad ki lynti kat ba lah ban pynioh ia kane ka jingdonkam jong ka Shnong.
La pyniaid ia ka prokram da u Jamris Siangshai uba dei u Chairman Shnong, la ioh ka kyntien pdiang burom na u Waheh Shnong ma I.K Rymbai ryngkat ka jingkren lamkhmat na u Secretary Shnong, u Wellson R D Siangshai.
Ki nongai jingkren ha kane ka sngi kynthup naduh ia u Chanmiki War ba dei u Asst. Professor Political Science Department jong ka KNGC, Jowai, u Nathan Ribok Biam President JSM-Western Region, ka Kong Kiewlang Dkhar ka ba dei ka Muktiar na ka Shnong Wapung Skur, ka Kong Everstay Dkhar ka ba dei Genl. Secretary JSM Women Wings Central Body.
La sam ia ka Memento bad pisa sha ki 20 ngut ki Samla pule ba la pass ha une u snem 2022.
La pynphuh pynphieng ia kani ka sngi da ka jingshad na ka Iahunlang V.O bad jingrwai na u samla Betterning Dkhar pynkut da ka kyntien Sngewnguh na u Bormi Dkhar, Asst. Waheh Shnong.