Ka JSU Syndai unit ha rygkat ki dkhot ka JSU Shillong Cricle hapoh ka jingialam u President u samla Pynshailang Suliang ha ka jingdonlang u General Secretary ka Syndai Unit u samla Heiplanmiki Tariang bad u nongialam ka JSU Shillong Circle u samla Banker Lamurong ryngkat bad ka jingdon lang ki dkhot jong ka seng ki lah leit bad pynkup burom kyrpang ia i samla Evangel Pohplet ha ka ïing sah jong i ha Shillong bad i samla Evangel Pohphlet i dei iba lah leit mih khmat ia ka jylla Meghalaya ha ka 3rd National K-1 Championship ka ba long ha ka jylla Rajasthan bad ha kane ka lympung kaba heh duh jong ka ri India bad i samla Evangel i lah ioh ban rah ia ka nam lahduh.
Na ka liang u President ka Syndai Unit u lah ban jur ia ka sorkar jylla ba ka dei ban ithuh ia ki rang bad ki thei lehkai ka jylla kiba mih khmat ia ka jylla ha ki lympung ba heh bad ka sorkar kadei ban ai jingiarap ia ki ba kin lah ban nang pyntbit shuh shuh ha ki kam ialehkai ka jong ki bad u lah ong ruh ka sorkar jylla haduh mynta ka shu shna kai ia ka State Youth Policy kaba lah ban wanrah jingmyntoi ia ki khun samla kiba don sap ka jylla hynrei kaba lyngngoh pat ka sorkar jylla haduh mynta ka shu leh mynthi bad kam pat pyntreikam ia kane ka policy kaba lah dep ban pdiang ha ka cabinet naduh u snem ba lah dep u 2021.
Kumta ka seng ka dawa mardor na ka sorkar jylla hapoh ka jingialam u Myntri Rangbah u Conrad Sangma ba u dei ban shim khia ia bad pyntreikam mardor ia ka State Youth Policy 2021 khnang ba ki khun samla kiba wanrah nam bad burom iaka jylla kin ioh noh da ka scolarship kumba lah mang kyrpang na bynta jong ki.
