Ka Jaiñtia Students’ Union (JSU) Sengkmie ha ka 25 tarik u Kyllalyngkot ka la pynkup burom ïa u Ex. General Secretary ka Central Body u samla Treiborlang R Suchen uba la shongthait na ka seng bad ban aireng pat ha ka Election MDC ka ban sa wan.
U samla Treiborlang udei uwei na ki Nongïalam uba la noh synniang shibun ki bynta ha ka imlang sahlang, hapoh ka jingïalam jong u, u la trei shit rhem bha na bynta ka kyntiew shaphrang ïa kiba bun ki mat ki jura jong ka jaitbriew.
Ïa ka jingïalang pynkup burom ha katei ka sngi la pynïaid da u Ryngkhat Diengdoh uba dei Disciplinary Secretary ka seng. La ïoh ïa ki jingkren bad pynkup burom da u President Rangbah ka seng u samla Jersom Shylla, kumjuh ruh la ïoh jingkren na u Acting Secretary Neilkee Mukhim, haka juh por la ai jingkren da u Publicity Secretary u Dapmain Suchiang bad Finance Secretary u Treki Mukhim.
U President Rangbah haba ai jingkren u pynkynmaw ba na ka seng JSU ki la mih shibun ki nongmihkhmat ha ka kam saiñ hima sima naduh mynshuwa. Ula ai mynsiem ïa kiwei ki dkhot ba kin nangtrei shitom haka bor ba ki don bad ka seng namar shisien ka sngi kum ki dkhot ki don bynta sa ka kam saiñ hima sima khnang ba kin lah ban shakri ïa ka jaidbynriew ha kawei pat ka bynta.
U Samla Treiborlang R Suchen, ula ai ruh ïa ki kyntien sneng, ula kyntu ruh ïa ka seng ban trei shitom na ka bynta ka Jaitbynriew.
Ka seng JSU ka la kitbok kit rwiang ruh ïa u Samla Treiborlang R Suchen ba un ïoh ïa ka jingjop kaba don burom ha kane ka election MDC. Pynkut ka kyrwoh na u Publicity Secretary samla Dapmain Suchiang.
