Ka Khasi Students’ Union (KSU) Nongbareh Lyntiar Unit kaba hap hapoh ka jingpeit jingkhmih ka KSU War Jaiñtia Circle ha ryngkat ka jingsynroplang ka Dorbar Shnong Nongbareh mynta ka sngi Saitjaiñ kila ïoh ban pynkupburom daka khusnam 1st Maitshaphrang Academic Award ïa ki samla pule ka shnong Nongbareh kiba la wan shakhmat ha ki SSLC Examination.
Kane ka jingsam khusnam ka long kum ka dak ban nangkyntiew bad ai mynsiem ïa ki khynnah ba kin nangkiew shaphrang ban wanrah burom ïa ka shnong ka thaiñ War Jaiñtia bad ïa ka jaitbynriew hi baroh kawei.
Ha kane ka sngi la ïoh ruh ka jingkren na u Samla Laitphar Syngkrem President KSU West Jaiñtia Hills District uba long ruh u kongsan ha kane ka sngi bad la ïoh ruh kiwei kiwei de ki nongkren kiba kynthup ïa u Roosevelt Lamin uba dei u Waheh Shnong Nongbareh Lyntiar bad uba bat ruh kum u President KSU Nongbareh Lyntiar Unit bad na u bah Fifthly Carlton Manner Chairman Nongbareh Lyntiar.
Baroh kitei ki nongkren kila kyntu bad ai mynsiem ïa ki khynnah skul ba kin nang trei shitom ban wad ïa ka jingnang jingstad kaba long ka lawei ba phyrnai kaba ïalam ruh ïa ki ban pynïar ïa la ki jingmut jingpyrkhat ban ïoh sei ïaki riewstad riewshemphang hapoh ka thaiñ Ri War Jaiñtia.
Ha kane ka sngi la wan ai mynsiem ruh da ki kmie ki kpa bad nonghikai jong kine ki samla pule lem bad ka shnong Nongbareh Lyntiar.
