Ka Khasi Students’ Union (KSU) Kupli Area Circle, ha kane ka sngi saitjaiñ 30/08/2025 kala pynkup burom ïa ki samla pule ka thaiñ kiba lehbha ha ki eksamin bapher bapher ha ka Shnong Saphai, ïa kane ka jingpynkup burom ïa ki samla pule ka long kum ka dak ban ai mynsiem bad ban pynshlur shuh shuh ïa ki samla pule ka thaiñ ban ïai minot hala ka pule puthi.
Ha kane ka sngi u President Rangbah ka KSU-CEC samla Lambokstarwell Marngar ula long kum u kongsan bad u Samla Shiningstar Kharbihkhiew, Environment Secretary KSU sengkmie kum u symbud kongsan, ha ka jingïadonlang ruh ki nongïalam ka KSU, West Jaiñtia Hills District Unit naduh u President samla Laitphar Syngkrem, Vice President Chanbor War, General Secretary Leningrad Tariang nalor kiwei de.
Ha shwa ban pynkup burom ladon ka jingïalang ba lyngkot bala pynïaid da u Samla Leiki Richard Tyngkan u General Secretary ka KSU Kupli Area Circle bad la ïoh ka jingkren pdiang burom da u samla Balawantei Suchiang u President ka KSU Kupli Area Circle. Ha kane ka sngi la ïadonlang ka Synjuk ki 13 Waheh Shnong ka thaiñ, u Officers Incharge ka Saphai Police Outpost bah R. Suiam, u P. K Shullet ba long Engineer ka tnat MeECL, u Risalan Rymbai incharge ka tnat Fire Service Saphai, Dr. Carius Passah bad kiwei kiwei ki riew paw khmat ka thaiñ.
Hashwa ka jingpynkup burom la ïoh ban pynlong da ka Drawing Competition ïa ki heprit na ki katto katne tylli ki skul bad ruh ka debate competition da ki khynnah skul halor ka phang ‘Social Media’.
La pynkut noh ïa kane ka sngi da kaba sam ïa ki khusnam sha ki samla pule bad ban pynkup burom ruh sha ki rangbah ba ïoh ïa ka kyrdan Officer bad ïa ki Rangbah Shnong na katei ka thaiñ.
