Ka Seng Kur Shylla Khasi Jaiñtia, mynta ka sngi 03.09.2022 ka la pynlong ia ka jingsam khusnam ne pynkup burom ia ki 38 ngut ki samla ba pass bha ha ka Exam jong ka MBOSE bad CBSE bad kumjuh ruh ia ki lai ngut ki samla ka kur kiba la wan rah burom ha ka liang ka Sports. Ia kane ka jingpynkup burom ia kitei ki samla la pynlong ha Ummulong Dorbar Hall, WJHD, ha kaba u ma Wailadmiki Shylla uba long u MLA ka Jowai u la long u kongsan.
Ki lai ngut samla ka Kur Shylla kiba la wan rah burom ha ka liang ka jingialehkai Sports ki kynthup ia u Cheltis Shylla uba la wan ba nyngkong ha ka jingialehkai Karate, u Kyrshanlang Shylla uba lawan ba nyngkong ha ka 200 Meter Race bad u Chibait Donhi Shylla uba poi haka kyrdan 2nd Runner Up ha ka 4×100 Relay Race, baroh kine ki lai ngut ki la ioh ban wanrah ia kane ka nam ha ka 4th Meghalaya Game 2022, ha ka kyrdan Under 17 Boys.
Mynta ka sngi ia ka jinglang la pyniaid da ka kong Aiti Shylla, ha kaba la ioh ruh ki jingkren na u President Sein Kur Shylla ma Pyrkhat Shylla, ma Laitsing Shylla, ma Meshak Shylla, ka samla Jesmica Shylla kaba la ioh haduh 92.33 % ki marks, ha ka jingiadon lang ruh ki ki nongkitkam jong ki Unit bapher bapher ka Seng Kur Sylla Khasi Jaiñtia.
U ma Wailadmiki Shylla haba kren mynta ka sngi u la ai ka jingiaroh ia ki nongkit kam ka seng Kur, ba ki la lah ban pynlong ia kum kane ka jait programe kaba donkam bha na ka bynta ki samla, kaba long kawei naki kam ban pynshlur shuh shuh ia ki ha ki kam pule puthi ka jong ki. U la ong ba kam myntoi ia ka kur lada ki long kiba riewspah lada ngim long kiba nang ba stad, ula ong ba mynta ki sngi ngim pynleit skul shuh ia ki khun jong ngi ban ioh kam sorkar, namar mynta ka pyrthei ka long kaba eh wat haba la ioh 80 na ka shi spah ki marks ruh wat tang ban ioh Admission ne rung sha ki jaka pule ruh ka long kaba eh bha mynta ki sngi, ym shuh kum ka por kaba mynshwa, namar mynta ka pyrthei ka la bun kiba nang bastad bad haba leit pule sha ki kyrdan ba shalor ruh ym dei ban khmih lynti ban ioh ia ka kam sorkar hynrei lada ngi don ka jingstad halade ngi lah ban trei ia ki shi bun kiwei pat ki jait kam.
U la ong ruh ia ki samla ba kane ka jingpynkup burom iaki ka long tang kum ka jingpyn kynmaw ia ki, ba kin nang iai trei shitom shuh shuh nangne shakmat, na ka bynta ban long ki khlur ki ban wan rah ia ka nam ka burom ia ka kur bad ka jait bynriew. Na ka liang u ma Wailad u la ai khublei kyrpang ruh ia ki kmie ki kpa kiba ai jingnang jingstad ia ki khun jong ki namar khlem ka jingdon bad jingkyrshan jong ki kane ka prokram kam lah ban long kaba jop.
Ka Samla Jesmica kaba ioh haduh 92.33% ki mark haba kren ka la pynpaw ia ka jingsngew nguh ia U Blei kumjuh ruh ia ki kmie ki kpa jong ka da kaba ong ba khlem maki kiba la synran lem ia ka kam lah ban leh ei ei ruh em.
Kiwei de kiba ai jingkren ki kynthup ia u Banshanlang Shylla
Mynta ka sngi la pynphuh pynphieng ia kane ka sngi da ki jingrwai bad jingshad na ki samla Sein Kur War Jaintia, Sein Kur Ialong, Sein Kur Sabah Muswang bad kiwei de.