Ka Mawkyrwat Block Congress Committee lyngba ka Youth Congress Committee ha ka 11 tarik u Naitung 2025 ka la ioh ban pynkup burom ïa ka samla Banrihun Lyngdoh Marshilong ka samla kaba la khur ar tylli ki takma ksiar ha ka jingiakop ïa khun kti (Arm Wrestling) ba la pynlong da ka Kerala Arm-Wrestling Association ha Kerala.
Ha kane ka sngi la ïa donlang u bah Kynpham V. Kharlyngdoh, President District Congress Committee, u bah Andrias Kharkongngor, Secretary Mawkyrwat Block Congress Committee, u bah Ribrensing Pariong, President Marshilong Congress Primary Unit , u bah Kynsailang Lyngdoh, President Youth Congress Committee, Mawkyrwat Block, bad u bah Gilbert Thongni, Myntri Shnong Marshilong.
Haba ai jingkren, u Bah Kynpham V Kharlyngdoh u la ai ka jongïaroh ïa ka samla Banrihun Lyngdoh Marshilong kaba la poi sha ka thong ka jingjop bad kaba la wanrah nam wanrah burom ia ka dong ka thaiñ hadien ka jingioh ban khur haduh ar tylli ki takma ksiar.
Na ka liang ka samla Banrihun Lyngdoh Marshilong ka la ïathuh ba ka jingjop jong ka ha kane ka jingiakop ïa khun kti ka dei lyngba ka jingai mynsiem naduh na iing na sem, ka shnong ka thaw, ka distrik bad kumjuh ruh na ki para ba ïalehkai lang.
Shuh shuh ka ai khublei ruh ïa baroh kiba don bynta ban kyrshan ïa ka, la ka long lyngba ka pisa tyngka bad kumjuh ruh kiba ai mynsiem lyngba ki jingduwai bad ka ai khublei kyrpang ruh Ia u bah Aldous Wanniang, President Arm-Wrestling jong ka South West Khasi Hills District uba la kyrshan ia ka ha ka jingleit ïashim bynta jongka ha ka Kerala Arm-Wrestling.
