-Khur ka Ioana Mery Sumer ia ka khusnam Babu (L) Puramon Tariang Award for Excellence-
Mynta ka sngi ki nongpyniaid jong ka Nongtalang College, Nongtalang, West Jaintia Hills, kila ioh ban pynlong ia ka sngi pynkup burom ia ki samla pule ne ka Graduation Day 2025, jong katei ka College hapoh jong ka Hall jong ka College. Ha kaba u MDC jong ka War Central u ma Jamshaprang Pohtam u la long u Kongsan.
Haba ai jingkren ha kane ka sngi ba kyrpang ki samla kila la jop ha ki jingpule jong ki u ma Jamshaphrang ula iaroh shi katdei ia ka jingtrei shitom jong iwei pa iwei i samla pule jong kane ka College, kumjuh ia ka jinglah jong ki bor pyniaid kaba dei ka Governing Body (GB) bad ruh ia ki nonghikai (Lecturers) baroh kynthup ia u Principal jong ka Nongtalang College.
U MDC ula kynmaw burom ia ki matti jong ki riew khraw pyrkhat jong kane ka shnong ha kato ka por kiba la seng nongrim ia kane ka College kiba kynthup ia u Chui Lyngdoh, u John Deng Pohrmen, u Phidelis Pohrmen, bah S. Tariang bad ki nongshong shnong jong ka shnong Nongtalang. Dei lyngba jong kine ki rangbah ba kane ka College ka la long kumba long haduh mynta, u la ong.
U Kongsan u la ai khublei ia baroh ki samla pule ka College kiba la trei shitom ba dei lyngba jong ki ba la lah ban pynlong ia kane ka sngi ba kyrpang. U la ai ka jingsneng jingkyntu ia baroh ki samla pule ka Nongtalang College kiba la dei ban mih noh na kane ka College. Ia kito kiba dang iohlad ban bteng ia ka jingpule ba shaphrang u dang iai kitbok kit rwiang ba kin nang iaid shaphrang. Hynrei na bynta kito ki bym ioh lad na ki daw bym lah kiar, hynrei dei ban kynmaw ba ka por kaba la dep kala dep bad mynta ka la dei ban peit ia ka ba mynta (present) ka jong phi, bad ban mad noh ia ka pyrthei ba shisha ha ka jingim jong ki, ha kaba kila hap ban ieng hala ki jong ki kjat.
U ong ba mynta ka kynti ban ioh ia ka kam ka jam sorkar ka long ka jingiakhun kaba eh bha, namar ka jingduna ki kam, hynrei ki nongialeh pat da ki hajar ngut. U la pynkynmaw ia ka jinghiar ka ioh ka kot ha ka jylla, ka ri bad ha ka pyrthei hi, kumta u buh ka jingkyntu ia ki samla ban long kiba adkar, kiba shlur ha ki liang baroh.
Kum u Nongmihkhmat paidbah u la ong ruh ba kumba long mynta ka synshar khaddar hapoh ka jylla ka long kaba la bam kruiñ da ka jingbamsap bampong, kumta kum ki samla kiba la nang la stad ki dei ban shimkhia, khnang ban wanrah ka jingmyntoi ia ka pateng kaba mynta bad ka ban sa wan.
U MDC ula pynkynmaw ruh ba na ka liang ka ïing ka sem jong ki don ban ai sngewbha ia kane ka khusnam “Babu (L) Puramon Tariang Award for Execellence” kum ka jingpynsah nam pynsah burom ia ka kyrteng jong utei u rangbah uba ju long uwei na ki Principal jong kane ka College.
Ia kane ka khusnam la ai sha ka samla Ioana Mery Sumer, kaba na ka shong Mawlong, kaba poi ha ka kyrdan kaba 9 jong ka Result NEHU Top Ten ha ka BA Khasi.
Ha kane ka sngi la ai khusnam sha baroh ki 40 ngut ki samla pule bad na kine 3 ngut ki dei kiba la poi ha ka kyrdan First Division (First Class).
Ia ka jingialang la pyniaid da u Mantre Passah, Lecturer in Pol. Scs, ka jingkren pdiang na u Rymphai Pdang (Commerce Dept).
Kiwei de kiba la ai jingkren ki kynthup ia u Principal Dr. R.R. Kharkongor, u ma Kat Kassar, General Secretary ka shnong Nongtalang, u ma Hatmin L Giri uba dei u President ka Governing Body bad u bah Medon Thangkhiew.
Kiba la iadonlang ha kane ka sngi pynkup burom ki kynthup ia u Headman ka Nongtalang u ma Min Lyngdoh, ki dkhot jong ka Governing Body bad ki wei de ki nongshong shnong.
