Ka National People’s Party 1-Nartiang Constituency ha ka 1st April 2023 ka la pynkup burom ia u ma Sniawbhalang Dhar, M.L..A u ba la jop 4 (saw) sien kynthih bad kumjuh ruh uba long mynta kum u Symbud Myntri Rangbah ka Sorkar Meghalaya bad dei peit ruh ia ka tnad Commerce & Industries Department, Department of Prisons and Correctional Services, Transport Department, Urban Affair Department, ïa ka jingialang la pynlong ha Wahiajer Community Hall, Wahiajer.
Ïaka jingïalang la pynïaid da u ma Hamkom Kynriam President ka NPP 1-Nartiang Block Constituency bad la sdang da ka jingduwai na u TBn. Sanwotki Laloo Waheh Shnong ka Wahiajer. La ïoh ïa ki kyntien pdiang sngewbha na ka kong Phyrnai Sariang Secretary ka Women Wings 1-Nartiang Constituency bad ka jingshad pdiang sngewbha na ki samla kynthei ka shnong Wahiajer.
U ma Briwon Pohshna Adviser jong ka NPP 1-Nartiang constituency ula ai ïa ki kyntien maitphang, ha kaba ula ïaroh ïa ki kam ba bha jong u ma Sniawbhalang Dhar ha kine snem ba la leit bad ula kyrpad ruh ïa u M.L.A ban dang wahrah shuh shuh ki kam pynroi naka bynta ka 1-Nartiang Constituency.
Ha katei ka sngi la ïoh ruh ïa ka jingrwai kyrpang na u Samla Deibor Suting na ka shnong Thadmusem ha ka jingïadei bad kane ka sngi bad ki jingai sngewbha kum ka dak ka jingpynkup burom na ki Lai tylli ki tnad trei kam ka National People’s Party 1-Nartiang Constituency kata naduh ka Main Body, Women’s Wings bad Youth Wings.
Katba na ka liang u ma Sniawbhalang Dhar M.L.A bad kumjuh ruh u Symbud Myntri Rangbah haba ai jingkren, ula ai khublei ïa baroh ki Nongïalam bad ki nongkyrshan ka party kiba la trei shitom ban pynjop donburom biang ïa u haduh 4 (saw) sien kynthih na kane ka constituency.
U la ong “Ka long ka burom kaba khraw ïa u kum u nongmihkhmat namar ka jingieid bad jingstad jong phi ki paidbah nong shong shnong ka Constituency ban pynjop bunsien bad mynta nga la poi ha ka kyrdan symbud Myntri Rangbah jong ka sorkar Meghalaya”.
U la kubur ba kum u briew um lah ban leh lut nadong shadong kat kum ka jingkwah ki paidbah hynrei u la pyrshang katba lah ban wanrah ïa ka roi ka par ha ka Constituency katba lah. U la kular ruh ban trei shitom bad ban leh khambha shuh shuh ïa ka Constituency ban wanrah ïa ki Development bapher bapher bad ban kyntiew ïa ka ïoh ka kot, ka rep ka riang, ka pule puthi, ka koit ka khiah bad kiwei kiwei de kiba ka Constituency ka dang donkam ban kyntiew shajrong.
Ïa ka jingïalang la pynkut da ki kyntien ai khublei na u ma Thombor Shiwat, Chief Executive Member ka JHADC.
