Ka National People Youth Front (NPYF) jong ka South West Khasi Hills District ha ka 9 tarik u bnai Nailar, 2025 ka la ïoh ban pynkup burom ïa ki 46 ngut ki khynnah pule kiba la leh bha ha ka eksam SSLC kiba ïoh 80% sha jrong bad ha ka HSSLC kiba ioh 75% jong u snem 2025 ha ka jingïalang ba la pynlong ha ka Hall jong ka Sngap Syiem College, Mawkyrwat.
Ha kane ka sngi la ïadon lang naduh u Ma Wailadmiki Shylla, President NPYF Meghalaya State Unit uba dei ruh u MLA ka Jowai Constituency bad u la long ruh kum u kongsan ha kane ka sngi.
Nalor u kongsan la ïadonlang u bah Carness Sohshang, Co- Chairman Meghalaya State Development Reforms Commission kum u symbud kongsan, u Dr. K.K. Nongsiej, President ka NPP South West Khasi Hills District Unit, u bah Mandilost Nongbri, Working President ka NPP Ranikor Block, u Valdo Lyngdoh, President ka NPYF South West Khasi Hills District Unit lem bad kiwei de kiba kynthup ïa ki khynnah skul kiba shah pynkup burom, ki kmie ki kpa bad kiba la shah khot sngewbha.
La pynïaid ïa kane ka jingïalang da u bah Firstmonthborn Lyngkhoi, ka program kyrpang u bah Thrangbor Wanniang bad ka Lashailang Myrthong bad ka jingkren khublei na u bah Iasohlang Nongrem, General Secretary ka NPYF jong ka South West Khasi Hills District.
