Ka Ryntih Sports & Cultural Club (RSCC) Laitlyngkot ha ryngkat ka jingiatreilang bad ka Dorbar Shnong Iewshillong mynta ka sngi ka 27 tarik Jylliew ki la pynkup burom ia 2 ngut ki rangialehkai jong ka shnong ba kynthup ia u Ricky John Shabong bad u Ronney Willson Kharbuddon ki ban mihkhmat na ka jylla sha ka jingialehkai ISL na ka club Goa Fc bad ka Punjap FC.
Ha kane ka sngi ba pynkupburom la iadonlang u MLA u bah Gavin Mylliem u MDC u bah Shemborlang Rynjah, u Sordar, ki nongkitkam shnong ki Seng Samla, ki bor pyniaid jong ka club, ki paidbah nongshong shnong ki khynnah skul bad kiwei de.
Na liang u MLA u bah Gavin Mylliem haba kren ha kane ka sngi u la ai khublei ia u samla Ricky John Shabong bad u Ronney Wilson Kharbuddon kiba la shah jied ban leit ialehkai ha ka Indian Super League bad u la ai ka jingkitbok kitwriang ia kine baroh arngut ki samla Khasi ba ki nang kiew shaphrang ha ka rynsan ialehkai bapher bapher ha ka kam ialehkai jong ki.
Shuh shuh u la ong ba kum ka sorkar dang shen ka la pymih ia ka policy kaba thymmai ka Meghalaya Outstanding Sport Person direct appointment mynta u snem 2025 ha kaba kino kino ki samla ialehkai kiba la mihkhmat ia ka jylla ha ki kam ialehkai ha ka National bad International ka sorkar kan ai da ka kam sorkar.
U ai khublei kyrpang ia ka Ryntih Sports Social & cultural Club ha kaba la shim ia kane ka sienjam ban pynlong ia kane ka program kaba jop ban pynkup burom ia 2 ngut ki khynnah ka club, bad kum u MLA un iai don ryngkat lang bad kane ka club na ka bynta ka jingiatreilang ban kyntiew shuh shuh ia ka kam ialehkai.
Na ka liang u MDC u bah Shemborlang Rynjah u ai khublei ia u Samla Ronney Wilson Kharbuddon bad u Samla Ricky John Shabong kiba la shah jied ban mihkhmat ia ka jylla sha ka jingialehkai ISL (Indian Super League) bad ka dei ka jingtrei shitom bad ka jingminot jong ki ban poi shaduh kane ka thong.
U la bynrap ki nongmihkhmat kim don kyrdan hynrei ka jingminot jong kine ki samla ka dei kane kein ka kyrdan, u la ong ngam sngewdon hok ban batai na ka bynta jong ki kaei kaba ki dei ban leh, wat tang ban lehkai na ka Elaka Laitlyngkot ki don da ki phew ngut hynrei kiba shah jied ki don tang 14 ngut ka long kaba eh ban lehkai wat tang na ka Elaka Laitlyngkot katno tam lei ba phin ioh ban lehkai ha ki club jong ka ISL.
Shwa ban pynkut u la kyrkhu ia ki lyngba ki jingduwai ba kin tyngshaiñ ha kane ka jingialehkai ISL ka ban sa wan bad ha kawei ka sngi da ka jingngeit ba u khun Khasi un sa ioh ban lehkai ha ki club jong ka pyrthei.
