Mynta ka sngi ka St. Anthony’s College Extension kaba don ha shnong Byndihati, East Jaiñtia Hills District kala ioh ba pynlong ia ka prokram pynkup burom bad khublei (5th Graduation Cum Farewell Celebration) ia ki samla bala pass na kane ka College.
Ia ka jingialang la pynlong ha phyllaw jong ka College, ha kaba u P.S. Shukhla, Vice Chancellor ka North Eastern Hills University (NEHU) ula long u kongsan jong kane ka sngi.
Haba kren ha ka jingialang u Shukhla ula iaroh shi katdei eh ia ka Don Bosco Society kaba la ai ka jingshakri ban pynioh jingnang jingstad ia ki khynnah ym tang hapoh ka jylla Meghalaya hynrei ha baroh kawei ka thaiñ Shatei Lam Mihngi (North Eastern Region).U la pynkynmaw ruh ia baroh ki khynnah bad samla pule ba kin long kiba nang ban pyndonkam hok ia ka por.
La ioh ruh ka jingkren na u Dr. H.H. Mohrmen uba la banjur ba ka sorkar ka dei ban thaw ki lad ki lynti ban pyniohkam iohjam ia ki samla jong ka ri. Ula pynkynmaw ruh ba ka ri India ym tang ba ka dei kawei na ki ri ba bun briew ha ka pyrthei, hynrei kan sa tam ruh wat ia ka ri China halor ka jingbun briew ha u snem 2024 da kaba u sot na ka report jong ka Technical Group on Population Projections, 2020. Ula ai jingsneng jingkyntu ruh halor ka rukom pyndonkam ia ki Internent bad ki Social Media.
Kiwei de ki ba la ai jingkren ki kynthup ia u Fr. G.S. Lyngkhoi, Principal In charge of the extension, Fr Paul O. Lyngkot SDB, Salesian Provicial, Shillong bad u Fr George Maleikal College Administrator.
La ioh ruh ka jingpyni ia ki rukum tynrai na ki samla pule kiba pule ha kane ka College kiba dei na ki thaiñ bapher bapher jong ka North East Region, ka ka shad Bamboo Dance jong ki Mizo, Thougal Jagoi Dance na Manipur, Chad Nongrep na samla pule traishnong bad kiwei de. La ioh ruh ka jingrwai Choir.
Kham hashwa u Fr. G.S. Lyngkhoi ula plie paidbah ia ka Indoor Hall jong kane ka College ka ba don lang bad ka Gym bad kiwei de ki Indoor Games.
