-Synñiang ka Jowai Cooperative Urban Bank 50 hajar ïa ka WJDSA-
Ka West Jaiñtia District Sports Association (WJDSA) mynta ka sngi 23 tarik u Nohprah kala pynkup burom ïa u MLA ka Jowai Constituency u ma Wailadmiki Shylla uba long mynta kum u Myntri ba dei peit ïa ka tnad Sports and Youth Affairs bad ka tnad ka koit ka khiah ka sorkar jylla, haka jingïalang bala pynlong ha madan Kiang Nangbah Stadium Dongmihsngi, Jowai.
Ïa u ma Wailadmiki Shylla la pdiang burom da ki nongkitkam ka WJDSA, ki riew rangbah ka thaiñ bad ki nongshah khot sngewbha, ha kane ka sngi la donlang ruh ki nongkitkam ka Jowai Co-operative Urban Bank Ltd, Jowai kum ka dak ban rakhe ïa ka Golden Jubilee (50) snem ka jingïaid lynti jong ka bad kala synñiang haduh Rs.50,000/- (Sanphew hajar tyngka) sha ka WJDSA.
U ma Wailadmiki Shylla haba ai jingkren ha kane ka sngi ula pynpaw ka jingai khublei ïa ki nongkitkam jong ka WJDSA kiba ka trei shitom manla u snem ban pynlong ïa ki lympung ïalehkai ha ki kyrdan bapher bapher.
Shuh shuh ula pynsngew ba kane ka jingpynkup burom jong ka Association ïa u ka long kum ka dak ban ai mynsiem ïa u kum u MLA ka thaiñ bad u Myntri sorkar ba un trei shitom shuh shuh naka bynta ban pynbit pynbiang ïa ki jingdonkam jong ka Sports hapoh ka District bad ha ka jylla hi baroh kawei.
Ula ai khublei ïa u Myntri Rangbah bad kumjuh ïa ki Symbud Myntri Rangbah ka jylla kila la ibit ïa u ban shim ïa kane ka kam myntri, ha ka juh ka por ula khot lang ïa baroh ban long kiba ïatreilang na ka bynta ka bha ka miat bad ka roi ka par.
Shi bynta na ka National Games kan ban long hapoh ka jylla Meghalaya, kum u myntri un ïakhun katba lah ban wanrah ïa ki katto katne jait ki jingïalehkai ba paw hapoh ka West Jaiñtia Hills. Da kaba ong ba ka West Jaiñtia ka long kaba kiew bha ha ka kam ïalehkai Sports bad man ki jingïakhun hapoh ka jylla ka wan haka kyrdan ba ar hadien ka East Khasi Hills District.
U ma Wailadmiki Shylla ula pynsngew ruh ïa ki kam pynroi kiba la wanrah hapoh ka sor Jowai bad kumjuh ruh ïa kiwei de kiba yn sa pyntreikam noh ïa kiba ka sorkar kala dep ban Sanction pisa. Ula kular ruh katba u dang long MLA ïa ka khusnam jong ka Super Division ka WJDSA un dang ïai bteng ban bei pisa manla u snem kaba long Rs.1,50,000/- (Shilak Sanphew hajar tyngka) bad ïa kane yn dang lah ban pynkiew katkum ka jingdawa jong ka por.
Ha kane ka sngi ïa ka jingïalang la pynïaid da ka kong Rinibeth Patlong, la ïoh ka jingnguh Blei da u ma Puramon Kynjin Dalloi ka Elaka Jowai, ka jingkren na u Working President ma E.M.H Passah kumjuh na u ma Lamwan Paswet kum u Symbud Kongsan, la ïoh ruh ka jingrwai na u Deiwitawan Synnah, ka Drill na ki khynnah skul ka North Liberty HSS, ka jingpynkup burom ïa u MLA da u Assistant Football Secretary bad ïa ki kyntien ai khublei la ïoh na u General Secretary WJDSA ma Lammat oo Laloo.
