Ka Womens Welfare Organisation (WWO) Seinraij Jowai, kumba juh long manla u snem hakane ka sngi saitjain 28.10.2023 kala pynkup burom ia ki khun samla ka Niamtre kiba la pyndep ia ka kyrdan Ph.D kumjuh ruh ia ki ba ioh haduh 80% shaneng ha ki ekasam jong ka kyrdan SSLC bad HSSLC.
Ha kane ka sngi la wan ban sakhilang da ka kong Bandarisha Lyndem, Chief Engineer PHE, Govt. of Meghalaya kum ka kongsan ryngkat u ma Antonio Lakiang, Deputy Secretary to the Governor of Meghalaya kum u symbud kongsan, u President Seinraij Jowai ma Hercules Toi, kiwei de ki rangbah bad ki samla ka Niamtre.
Ki khun samla ka Niamtre kiba la ioh ia kane ka burom mynta u snem ki don haduh 11 ngut ha ka kyrdan SSLC, 3 ngut ha ka HSSLC bad 2 ngut pat kiba ioh ia ka kyrdan Doctorate, ha kaba ia ka jingpynkup burom ia ki la pyndep da ka kongsan bad kiwei de ki rangbah. Napdeng kine ar ngut ki la ioh ia ka kyrdan Seinraij Topper ki kynthup iaka Mayanka Pde na dong Salini Mihmyntdu kaba pule ha Jowai Goverment Public School kaba la pass ia ka ICSE Examination 2023 da kaba kala ioh haduh 94.3% ryngkat 5 tylli ki Distinction katba u samla Wansame Pakyntein uba pule ha Sri. Chaitanya Junior Kala Sale Pragathi Nagar, Hyderabad uba la ioh haduh 90.21% bad ki distinction ha ki saw tylli ki subject.
Ha kane ka program la don ruh ka jingpynkup ba kham kyrpang ia ki ar ngut ki samla kiba la ioh iaka kyrdan Doctorate, kita ki dei u Dr. Lincoln Dkhar na ka dong Chilliangraij. U Lincoln u la pyndep ia ka Ph.D ha ka subject Chemistry na NEHU, Shillong ha u snem 2023 bad ka Dr Toba Lamare na ka shnong Ummulong kaba la pyndep ia ka Ph.D ha ka Subject Education na NEHU, Shillong ha u snem 2017.
